सिद्धान्त लत्याउँदै बर्दियाका सहकारी

बर्दिया, १४ चैत । डिभिजन सहकारी कार्यालय बर्दियाले जिल्लाका अधिकांश सहकारी संस्थाहरुको कारोबार गैरसदस्यहरुसँग भएको जनाएको छ ।

अनुगमन तथा संस्थाहरुको अवस्थाको कारोबार हेरिएको आधारमा कार्यालयले सञ्चालनमा रहेका सहकारी संस्थाहरुको कारोबार गैरसदस्यहरुमा परिचालन भएको फेला पारेको हो । विभिन्न उद्देश्यले दर्ता भएका सहकारी संस्थाहरु बचत तथा ऋण लगानीको कार्यतर्फ आकर्षित गरी कारोबार गरेको कार्यालयले जानकारी दिएको छ ।

कार्यालयका सहकारी अधिकृत बुद्धप्रकाश पौडेलले सहकारिताको सिद्धान्तअनुसार गैरसदस्यहरुसँग कारोबार गर्न नपाइने व्यवस्था तथा विनियममा नै उल्लेख गरिए पनि यो अनुसार सहकारी संस्थाहरुले कारोबार नगरेको बताए । उनले कतिपय सहकारी सञ्चालकहरुले गैर कार्यक्षेत्रलाई सदस्यतासमेत दिएको भेटिएको बताए ।

कार्यालयले सहकारीका सदस्यहरु बाहेक अन्य सदस्यहरुसँग कारोबार गर्दा त्यसबाट उपलब्ध हुने मुनाफा सदस्यहरुलाई वितरण गर्न नपर्ने हुँदा फाइदाका लागि सञ्चालकले नियतवस यसप्रकारका सदस्यहरुसँग कारोबार गर्ने गरेको जानकारी दिएको छ । सहकारीको स्वायत्तता र स्वतन्त्रताको सिद्धान्तलाई सञ्चालकहरुले आफ्नै अनुकूलतामा प्रयोग गरेका छन् । तीन सय ७० वटा सहकारी संस्थाहरु रहेको सो जिल्लामा बचत १० कृषि १९, दुग्ध चार, बहुउद्देश्यीय चार सहकारी संस्थाहरु रहेका छन् । यस्तै कार्यालयले दिएको जानकारीअनुसार ५६ वटा सहकारी संस्थाहरु निष्क्रिय रहेका छन् ।