महासम्मेलनमा हंगामा मच्चाउने महिला सहकारीकर्मीको तयारी

काठमाडौं, १२ चैत । नेपालमा पहिलो पटक प्रथम राष्ट्रिय सहकारी महासम्मेलन सुरु भइरहँदा महिला सहकारीकर्मीहरुले महासम्मेलनमा हंगामा मच्चाउने तयारी गरेका छन् ।

पटक पटक केन्द्रिय महिला सहकारी संघ दर्ताका लागि विभिन्न पक्षसंग आग्रह र अपिल गरेपनि कुनै वास्ता नगरेपछि महासम्मेलनमै हंगामा मच्चाउने तयारी गरेका हुन् ।

सहकारी विभाग र मन्त्रालय सम्म धाउँदा पनि फाइल दर्ता हुन सकेको छैन । रजिष्ट्रारले लिङ्गका आधारमा केन्द्रिय सहकारी संघ दर्ताको प्रबधान ऐनमा नै नरहेको बताउदै आएका छन् । प्रस्तावित केन्द्रिय महिला सहकारी संघले पत्रकार सम्मेलन गरेर संघ दर्ताका लागि पहल नभए महासम्मेलन नै बहिष्कार गर्ने चेतावनी दिएको छ । पत्रकार सम्मेलनमा बोल्दै प्रस्तावित संघकी सह–सचिव निर्मला श्रेष्ठले संघ दर्ताको काम नभए महासम्मेलनको औचित्य समेत नभएको बताइन । कृषि भित्र नै बिभिन्न नाममा केन्द्रिय सहकारी संघ दर्ता हुने तर महिला भएकै कारण संघ दर्ता नहुनु दुखःद बिषय भएको टिप्पणी गरीन ।

कार्यक्रममा बोल्दै प्रस्तावितसंघकी अध्यक्ष शान्ति गुरुङले केन्द्रिय संघ दर्ता नगर्नुको कारण प्रष्ट पार्न माग गरेकी छन् । बिना कारण संगठित महिलाहरुको दर्ता नगर्नु महिला माथिको अपमान भएको बताइन । केन्द्रिय संघ दर्ता नगर्ने भए प्रारम्भिक महिला संस्था पनि खारेज गर्न चुनौती दिइन । उपाध्यक्ष मिना बरालले केन्द्रिय महिला सहरकारी संघ दर्ता भए आफुहरुलाई सहकारी क्षेत्रमा आरक्षण समेत नचाहिने बताइन । महिलाहरुको कार्यको सम्मान र शसक्तिकरणका लागि पनि संघ दर्ता गर्न दिइनु पर्ने माग गरीन । अनाहकमा बिना कारण महिला संघ दर्ता नगरी झुलाएको भन्दै अन्य महिला सहकारीकर्मीले पनि आपत्ति जनाएका छन् । महिलालाई सधै पछि पार्ने नियतले संघ दर्ता नगरीएको उनीहरुको आरोप छ । उनीहरुले राष्ट्रपति, प्रधानमन्त्री, मन्त्रालयगत मन्त्री र अन्तराष्ट्रि सहकारी महासंघकी अध्यक्षलाई समेत ज्ञापन पत्र बुझाउने तयारी गरेका छन् ।

महिला सहकारीकर्मीले करिब तीन बर्ष देखि केन्द्रिय महिला सहकारी संघ दर्ताका लागि पहल गर्दै आएका छन् । उनीहरुले जारी महासम्मेलनमा यस बिषयले प्राथमिता पाउनु पर्ने र संघ दर्ता हुनु पर्ने माग गरेका छन् । नेपालमा ३१ सय महिला सहकारी रहेका छन् । करिब १९ लाख ५३ हजार महिलाहरु महिला सहकारीमा आबद्ध रहेका छन् ।