नेपालका सहकारीकर्मी भारतको सहकारी बैंकको भ्रमण

काठमाडौं, ३ चैत । नेपालका विभिन्न १५ जिल्लाका सहकारीकर्मीहरुले भारतको हरियाणा राज्यको रीवाडी जिल्ला स्थित कृषि सहकारी र केन्द्रीय सहकारी बैंकको स्थलगत अध्ययन भ्रमण गरेका छन् । भ्रमणका क्रममा टोलीले हरियाणामा रहेको रेल संग्रहालय समेतको अवलोकन गरेको थियो ।

सहकारीकर्मीहरु प्रा.डा. डी. एन. यादवबाट सहकारी सिद्धान्त तथा मूल्य मान्यता, डा. दमन प्रकाशबाट सहकारी क्षेत्रमा विकसित हुँदै गएको विश्वव्यापी ट्रेण्ड र डा. एल के पन्तबाट सहकारी उद्यमशीलता विकास बिषयमा प्रशिक्षित समेत भएका छन् ।

त्यसैगरी भ्रमणका क्रममा  डा. जी एस आजादले सहकारी तथा सहकारी संजालको सशक्तिकरण र डा. के जी वाखेदले भारतमा सहकारीता मार्फत ग्रामीण क्षेत्रको विकास बिषयको कार्यपत्र प्रस्तुत गरेका थिए । भ्रमण टोलीले कृषि सम्बन्धि प्रयोगात्मक ज्ञान हासिलका लागि कृषि विज्ञान संग्राहलय र इफ्कोको रसायनिक मल उत्पादन तथा बजार व्यवस्थापन सम्बन्धि स्थलगत भ्रमण पनि गरेका छन् ।

राष्ट्रिय सहकारी संघको आयोजना र ईण्डियन फारमर्स फर्टिलाईजर कोअपरेटिभ (ईफ्को) को निमन्त्रणामा ३५ सदस्यीय टोली त्यहाँ पुगेको थियो । सहकारी राष्ट्रिय सहकारी संघका संचालक रामचन्द्र उपे्रती नेतृत्वको सो टोलीमा बचत ऋण सहकारीका १५, बहुउद्देश्यीय सहकारीका ९, कृषि सहकारीका ७, उपभोक्ता, बिद्यूत र कफी सहकारीका एक एक र सहकारी पत्रकार समाजका एक पत्रकार सहभागीता रहेको थियो । टोली फागुन २७ गते भारत प्रस्थान गरेको थियो ।