जिल्लामा पहिलोपटक अण्डा उत्पादन गर्दै सहकारी

खोटाङ, २६ फागुन । अण्डा उत्पादनका लागि जिल्लामा पहिलोपटक सहकारीले लेयर्स जातको कुखुरापालन सुरु गरिएको छ । सदरमुकाम दिक्तेलस्थित कालिका कृषि सहकारी संस्था लिमिटेडले जिल्लामै पहिलोचोटी अण्डा उत्पादन गर्न कुखुरापालन सुरु गरेको हो ।

आगामी भदौ पहिलो सातादेखि अण्डा उत्पादन गर्ने योजना बनाएको संस्थाका अध्यक्ष सुवाष जोशीले जानकारी दिए । सहकारीको छ लाख ७० हजार र जिल्ला पशु सेवा कार्यालयमार्फत सरकारको पाँच लाख ६० हजार गरी १२ लाख ३० हजार रूपैयाँ लगानी भएको छ ।

नारायणघाटस्थित अविनाश ह्याचरीबाट प्रतिगोटा १५२ ले चल्ला खरिद गरिएको जोशीले बताए । यसबाहेक ढुवानीका लागि प्रतिगोटा २५ खर्च भएको छ । यातायात समस्याले जिल्लामा ताजा अण्डा उपभोग गर्न नपाएपछि अण्डा उत्पादनका लागि फर्म सञ्चालन गरिएको अध्यक्ष जोशीले बताए । उनका अनुसार दैनिक ९ सय अण्डा उत्पादन गर्ने लक्ष्य राखिएको छ ।