हातेमालो सहकारीले गुणस्तरीय वित्तिय सेवासंगै एकीकरण छलफल चलाउने

सिमरा, ११ फागुन । सिमरास्थित हातेमालो बचत तथा ऋण सहकारी संस्थाले सहकारी सिद्धान्त र मूल्यमान्यताको आधारमा वित्तिय सेवालाई थप गुणस्तरीय बनाउँदै आर्थिक, सामाजिक, सांस्कृतिक रुपान्तरणका लागि दृढतापूर्वक अघि बढने निर्णय गरेको छ । आइतबार बसेको सञ्चालक समितिको वैठकले उक्त निर्णय गर्दै कार्यक्षेत्रभित्रका सहकारीहरुवीच एकीकरणका लागि छलफल चलाउने कार्यदिशा पारीत गरेको छ ।

संस्थाले एउटै कार्यक्षेत्रभित्र धेरैवटा संस्थाहरुको स्थापना र क्रियाशिलताले वित्तिय सेवामा अस्वस्ध प्रतिस्पर्धा, लागत र जोखिम बढिरहेको निष्कर्ष निकाल्दै त्यसका लागि तत्काल कार्यक्षेत्रभित्रका सहकारीहरुवीच एकीकरण गोष्ठि र संस्थाहरुवीच एकीकरण वार्ता थालनी गर्ने जिम्मेवारी अध्यक्ष कृष्ण पौडेललाई दिएको छ ।

त्यस्तै संस्थाले यस वर्षको हातेमालो सहकारी पत्रकारिता पुरस्कारको मूल्याङ्कन, अध्ययन र छनोटका लागि कार्यदल गठन गरेको छ । संस्थाका सञ्चालक सञ्जय साहको संयोजकत्वमा गठित कार्यदलमा नेपाल पत्रकार महासंघ बाराको प्रतिनिधि र व्यवस्थापक महेश ढुङगेल रहने व्यवस्था गरिएको छ । संस्थाले गत वर्षबाट प्रत्येक वर्ष सहकारी तथा सामाजिक क्षेत्रमा कलम चलाउने जिल्लाका उत्कृष्ट पत्रकारलाई दश हजार रुपैयाँसहित हातेमालो सहकारी पत्रकारिता पुरस्कार प्रदान गर्न शुरु गरेको हो । गत वर्ष उक्त पुरस्कार नेपाल पत्रकार महासंघका पूर्वअध्यक्ष विनोद प्याकुरेललाई मरणोपरान्त प्रदान गरिएको थियो । यस वर्षको पुरस्कार संस्थाको सातौं स्थापना दिवस जेठ २० गते प्रदान गरिनेछ ।

अध्यक्ष कृष्ण पौडेलको अध्यक्षतामा सम्पन्न वैठकले गुणस्तरीय वित्तिय सेवासंगै व्यवसाय विविधीकरणको अवधारणाको कार्यान्वयन प्रक्रिया अघि बढाउनेसमेत निर्णय गरेको छ । शित भण्डारसहितको कृषि बजार, शिक्षा तथा स्वास्थ्यसेवामा प्रवेश गर्ने र त्यसका लागि कार्यक्षेत्रभित्र रहेका सहकारी संघसंस्थाहरु र सहकारीकर्मीहरुवीच छलफल प्रारम्भ गर्ने निर्णय गरेको संस्थाका सचिव यज्ञबहादुर आलेले बताए । २०६५ मा स्थापना भएको हातेमालो सहकारीले हाल एक हजार तीन सय सदस्यहरुवीच करीव १२ करोडको कारोवार गरिरहेको छ ।