सहकारीको नीतिगत सवालहरु विषयक राष्ट्रिय कार्यशाला गोष्ठि शुरु, नेफ्स्कूनले पनि नियमन शुरु गर्ने (फोटो फिचर सहित)

काठमाडौं, ५ फागुन । नेपालका वित्तिय सहकारीहरुको वृद्धि र विकासमा नीतिगत सवालहरु विषयक राष्ट्रिय कार्यशाला गोष्ठि आजबाट ललितपुरको हिमालय होटलमा आरम्भ भएको छ ।

कार्यशाला गोष्ठिको उद्घाटन गर्दै राष्ट्रिय सहकारी संघका अध्यक्ष, पूर्वमन्त्री एवम् संविधानसभाका सदस्य केशव बडालले सहकारी क्षेत्रलाई व्यवस्थित गर्न र मुलुकको आर्थिक सामाजिक एवम् सांस्कृतिक रुपान्तरणका लागि सहकारीलाई सम्वैधानिक, कानूनी र नीतिगत रुपमा व्यवस्थित गर्न जरुरी रहेको बताए ।

सहकारी क्षेत्रको पूंजी उत्पादन, कृषि व्यवसायीकरण, उर्जा र पर्यटनको विकासमा आउने वातावरण बनाउन जरुरी रहेको बताउँदै बडालले मुलकको व्यापार घाटा न्युनीकरण तथा स्वाधीन अर्थतन्त्र निर्माणका लागि राज्य, सहकारी र निजी क्षेत्रवीच स्पष्ट सहकार्यको आवश्यकता रहेको बताए । त्यस्तै कार्यक्रममा बोल्दै सहकारी तथा गरीवी निवारण मन्त्रालयका निमित्त सचिव सुरेश प्रधानले सरकारले वित्तिय व्यवस्थापन क्षेत्रमा छ वटा रणनीतिहरु तर्जुमा गरिरहेको र त्यसमा सहकारी एक महत्वपूर्ण क्षेत्र भएकोले यसको व्यवस्थापन र अनुगमनमा सरकार सहयोगी भूमिका निर्वाह गर्न तयार रहेको बताए ।

त्यसैगरी सहकारी विभागका रजिष्ट्रार केदार न्यौपानेले सहकारी सिद्धान्त, मूल्यमान्यता र अनुशासन कायम नगर्दा केही बचत तथा ऋण सहकारीमा समस्या देखा परिरहेको र यसमा राज्यलाई दोष लाउने प्रवृत्ति हावी रहेको बताए । सहकारीहरु आफैमा स्वायत्त संस्था भएको र केन्द्रीय तथा विषयगत संघले अनुगमनमा प्रभावकारी भूमिका खेल्नु पर्ने बताउँदै सरकार केन्द्रीय संघहरुलाई सहकारी संघ संस्थाहरुको नियमनको अधिकार दिन तयार रहेको र त्यसका लागि आफुले सहजीकरण गर्ने बताए । कार्यक्रममा नेफ्स्कूनका निवर्तमान अध्यक्ष एवम् एशियाली ऋण महासंघका वरिष्ठ उपाध्यक्ष मीनराज कंडेल, राष्ट्रिय सहकारी संघका उपाध्यक्ष विजयराज घिमिरे, सञ्चालक रविन्द्र केसीलगायतको उपस्थिति रहेको थियो । कार्यशालाको समुदघाटन सत्र नेफ्स्कूनका अध्यक्ष ऋषिराज घिमिरेको अध्यक्षता, सञ्चालक दामोदर अधिकारीको सञ्चालन, उपाध्यक्ष अमृता सुव्वाको स्वागत, महासचिव परितोष पौड्यालको विषयवस्तुमाथि प्रकाश र उपाध्यक्ष डिबी बस्नेतको धन्यवाद ज्ञापन रहेको थियो ।

दुई दिनसम्म चल्ने कार्यशालामा सहकारी विभागका रजिष्ट्रार केदार न्यौपानेलगायतले वित्तिय सहकारीमा देखिएका समस्याहरु, कर तथा राजस्व प्रणाली, वित्तिय सहकारीमार्फत वित्तिय समावेशीकरणको प्रवद्र्धन, सहकारीको वृद्धि र विकासमा उठेका नीतिगत सवालहरुलगायतका विषयहरुमा कार्यपत्र प्रस्तुत गर्ने कार्यक्रम रहेको छ । कार्यशालामा मुलुकभरका नेफ्स्कूनका पदाधिकारीहरु, जिल्ला बचत तथा ऋण सहकारी संघका अध्यक्षहरु, सहकारी तथा गरीवी निवारण मन्त्रालय, सहकारी विभाग, डिभिजन सहकारी कार्यालयका प्रमुखहरु सहकारी कमर्मीचारीहरु र नियमनकारी निकायहरुको सहभागिता रहेको छ । कार्यशालाले नेपाली वित्तिय सहकारी अभियानलाई दिगो र प्रविधियुक्त बनाउने र नेपाली समाजको रुपान्तरणमा भूमिकालाई प्रभावकारी बनाउने सवालहरुमा साझा र सकारात्मक धारणा तय गर्ने अपेक्षा लिइएको छ ।

नेफ्स्कूनले मुलुकको बचत तथा ऋण सहकारीहरुलाई दिगो बनाउने, काठमाण्डौंका सहकारीहरुबाट नियमन थालनी गर्ने र सहकारी स्रोत केन्द्र स्थापनाको थालनी प्रयास आरम्भ गर्ने भएको छ ।