झापाका सहकारीहरु कडा निगरानीमा

 झापा, १ फागुन । झापामा रहेका सहकारी संस्थाहरुले सहकारी मापदण्ड विपरीतका गतिविधि गरेको गुनासो आउन थालेपछि डिभिजन सहकारी कार्यालय झापाले अनुगमनलाई तीव्र पारेको छ ।

पछिल्लो अवस्थामा सहकारी संस्थाहरुले आर्थिक अनियमितताका घटना बढेकाले पनि नियमकारी निकायले चासो दिएका हुन् । सहकारी संस्थालाई प्रभावकारी रूपमा लैजान तथा नियम मिच्ने सहकारीलाई कारबाहीको दायरामा ल्याउन प्रक्रिया थालिएको डिभिजन सहकारी प्रमुख नेत्रप्रसाद घिमिरेले बताए ।

चार वटा सहकारीका सञ्चालकलाई कार्यालयमा बोलाई स्पष्टीकरणसहित सहकारी कानुनअनुसार काम गर्न चेतावनी दिइएको जानकारी दिए । जिल्लाको दमक, बिर्तामोडलगायतका क्षेत्रमा रहेका ती चार वटा सहकारी संस्थाले करिब सात करोड हिनामिना गरेको खुल्न आएको छ ।

त्यस्ता सहकारीले सङ्कलकलाई २० प्रतिशतसम्म कमिसन दिई बचत सङ्कलन गरिआएको खुलेको उहाँले जनाए । कार्यालयले त्यस्ता सहकारीको कारोबार बन्द गरिएको तथा सञ्चालकलाई धमाधम खोजी गरी कारबाही गरिएको उहाँले जानकारी दिए ।

बचतकर्ताले सङ्कलकमाथि मात्र विश्वास गरी बचत गर्ने तर ती संस्थाका वित्तीय कारोबारबारे चासो नलिँदा बचत जोखिममा पर्न सक्नेतर्फ सबै सचेत हुनुपर्ने डिभिजन प्रमुख घिमिरेको भनाइ छ । यसैगरी सघन अनुगमनपछि ती संस्थाको नियमित रूपमा सहकारी मन्त्रालयको प्रत्यक्ष अनुगमनमा राख्ने योजना रहेको जनाइएको छ । देशभर पाँच करोडभन्दा बढीका आर्थिक कारोबार गर्ने सहकारी संस्थाको कारोबारको सघन अनुगमन थालिएको हो ।

झापाका डिभिजन कार्यालयका प्रमुख घिमिरले जिल्लाका दुई दर्जनभन्दा बढी त्यस्ता सहकारीको अनुगमन भइरहेको बताए । झापामा हालसम्म सहकारी दर्ताको सङ्ख्या ७५३ पुगेको छ । तीमध्ये ५० वटा संस्थाहरु खारेजीको प्रक्रियामा छन् भने करिब ५० वटा संस्थाहरु निस्क्रिय अवस्था छन् । सहकारी ऐनअनुसार काम नगरेको भनी १३९ वटा संस्थालाई जरिवाना र चेतावनी दिइएको छ ।