मुसलमान समुदायको पहिलो सहकारी स्थापना

सुर्खेत, २० माघ । सुर्खेतको लाटीकोइलीमा मुसलमान समुदायको पहिलो सहकारी संस्था स्थापना भएको छ । स्थानीय नागरिकले वचत र ऋणको सुविधा लिन मिल्ने गरी मदिना वचत तथा ऋण सहकारी संस्थाको स्थापना गरिएको छ ।

सहकारी सञ्चालनका लागि मुसलमान समुदायले अकवर खानको अध्यक्षतामा नौ सदस्यीय तदर्थ सञ्चालक समितिसमेत गठन गरेका छन् । समितिको उपाध्यक्षमा हवि वक्स, सचिवमा सीमा वानु, सहसचिवमा रञ्जानु खातुन, कोषाध्यक्षमा नसिम वक्स तथा सदस्यहरूमा अहमद रज्जा, हाफिज खान, सकुर वक्स मियाँ, हनिफ वक्स मियाँ रहेका छन् ।

डिभिजन सहकारी कार्यालय सुर्खेतको नियमअनुसार १५ दिनभित्र सहकारी दर्ता गर्ने काम गरिने अध्यक्ष अकबर खानले बताउनुभयो । सहकारीको सेयर सदस्य हुनका लागि सुरुमा एकजनाले रु एक हजार रकम सङ्कलन गरेका छन् ।