करको दायरामा नआउने सहकारीलाई कारबाहीको तयारी

नारायण पौडेल

काठमाडौ, १७ माघ । सरकारले करमा दर्ता हुन छुट दिए पनि त्यसको अटेर गर्ने सहकारीलाई कारबाहीको दायरामा ल्याउने तयारी गरेको छ ।

ठूलो संख्यामा सहकारीहरु करको दायरा बाहीर रहेको भन्दै पटक पटक कर तिर्न ताकेता गर्दा पनि अटेर गर्ने सहकारीलाई कारबाही गर्ने तयारीमा सरकार लागेको हो ।सरकारले दिएको छुटको अबसरको सदुपयोग गर्दै हाल सम्म आधा मात्र सहकारी करको दायरामा आएको बताइएको छ । देश भर २७ हजार भन्दा बढी सहकारी रहे पनि करिब १७ हजार सहकारी मात्र करको दायरामा आएको आन्तरिक राजश्व विभागका महानिर्देशक टंक मणी शर्माले जानकारी दिए ।
सहकारी विभागमा दर्ता भएका सहकारीहरुलाई समेत करको दायरामा अनिवार्य आउनु पर्ने ब्यवस्था गरे पनि अझै १३ हजार भन्दा बढी सहकारी करको दायरा भन्दा बाहिर छन् ।पटक पटक ताकेता गर्दा पनि अटेर गर्ने ति सहकारीलाई अनुषन्धान गरेर कारबाहीको दायरामा ल्याउने विभागले जनाएको छ ।

सरकारले सहकारी दर्ता भए पछि प्यान नम्बर लिएर राज्यले निर्धारण गरेको कर तिर्नु पर्ने ब्यवस्था छ ।
करको दायरामा आउन नचाहने सहकारी संस्थाहरुबाट ठूलै मात्रमा कर छली हुदै आएको राजश्व विभागको ठहर छ । धेरै मात्रामा सहकारी करको दायरा बाहीर रहेको भन्दै सरकारले नियामक निकायलाई कडा रुपमा प्रस्तुत हुन निर्देशन समेत दिइएको बताइएको छ ।