सीतापाइला सहकारीले १५ प्रतिशत लाभांश दिने

काठमाडौँ, १३ पुस । सीतापाइला बहुउद्देश्यीय सहकारी संस्था लिमिटेडले आफ्ना सेयरधनीलाई १५ प्रतिशत लाभांश दिने भएको छ ।

संस्थाको आज बसेको १४ औँ साधारणसभाले सो निर्णय गरेको हो । सो सहकारीको संस्थागत पुँजी अहिलेसम्म रु एक करोड २२ लाख ८९ हजार ४०६ रहेको तथा कुल सञ्चालन खर्च रु चार करोड ५४ लाख तीन हजार ७६२ छ ।

नेपाली काँग्रेसका नेता तथा नवनिर्वाचित सभासद् भीमसेनदास प्रधानले सहकारीले देशका विभिन्न स्थानमा वित्तीय कारोबारको माध्यमबाट आर्थिक गतिविधि सञ्चालन गर्दै समाजमा आर्थिक समृद्धि कायम गर्न योगदान गरेकामा खुसी व्यक्त गर्नुभयो ।

संस्थाका अध्यक्ष केदार मानन्धरले वित्तीय क्षेत्रमा देखिएको तरलतालाई व्यवस्थापन गरी वित्तीय सुशासन कायम गर्ने प्रतिबद्धता व्यक्त गर्दै मुलुकको आर्थिक विकासमा भूमिका खेल्ने बताउनुभयो ।