नगद रहित कारोबारमा सीतापाईलाको जोड, सदस्यको पसल पसलमा क्यूआर कोर्ड

काठमाडौं : काठमाडौंको सीतापाईलामा मुख्य कार्यालय रहेको सीतापाईला बहुउद्देश्यीय सहकारी संस्थाले नगद रहित कारोबारलाई प्राथमिकता दिन सुरु गरेको छ ।

संस्थाले २२ औं स्थापना दिवसको अवसरमा क्यूआर कोर्डको शुभारम्भ गरेको छ । सदस्यलाई प्रविधिमैत्री बनाउनुका साथै नगद रहित कारोबारलाई प्राथमिकता दिन क्यूआर कोर्ड सेवा सुरु गरेको संस्थाका अध्यक्ष केदार मानन्धरले जानकारी दिनुभयो ।

संस्थाका सदस्यहरुले सञ्चालन गरेको तरकारी पसल, चिया पसल, औषधि पसल, फलफूल पसल तथा अन्य क्षेत्रका पसलहरुमा क्यूआर कोर्डमार्फत भुक्तानी गर्न सकिने व्यवस्था मिलाएको छ । उक्त पसलहरुमा कारोबार गर्दा ग्राहकले क्यूआर कोर्ड स्क्यान गरी रकम भुक्तानी गर्न सक्नेछ ।

संस्थाले डिजिटल प्रविधि मार्फत मिनि स्टेटमेण्ट लिन, मोबाईलमा टपअफ गर्न, विजुलि, टेलिफोन, इन्टरनेट सेवाको विल तिर्न, हवाई सेवाको टिकट बुकिङ्ग गर्नेलगायत सेवाका लागि संस्थाको मोबाईल एप्स यस अघिदेखिनै संचालन गरिरहेको छ ।

उक्त क्यूआर कोर्ड मार्फत देशभरीका सबै सपिङ्ग सेन्टर, अस्पताल, रेष्टुरेण्ट तथा होटलहरुमा सीतापाईला सहकारीको मोबाइल एप्समार्फत भुक्तानी गर्न सकिने अध्यक्ष मानन्धरले बताउनुभयो ।

संस्थाले सदस्यको पसल पसलमा क्यूआर कोर्ड वितरण गर्ने योजना बनाएको छ । क्यूआर कोर्ड सजिलै रकम भुक्तानी गर्न सक्नेछन् । संस्थाले एटिएम सेवा पनि सुरु गरिसकेको छ । संस्थाको मोबाईल बैंकिङमार्फत रकम ट्रान्सफर, वालेटमा ब्यालेन्स लोड, बैंक ट्रान्सफर लगायतका सेवा लिन सकिने छ ।