लसकुस सहकारीमा सञ्चालक र कर्मचारीको रजाई, सदस्यको बचत आफू खुसी चलाउँदा संस्था डुब्यो

सहकारी खबर

३० माघ २०७७, शुक्रबार

काठमाडौं : काठमाडौंको पकनाजोल स्थित लसकुस बहुउद्देश्यीय सहकारी संस्थाका सञ्चालकले करोडौं रुपैयाँ हिनामिना गरेको भेटिएको छ ।

सदस्यहरुबाट उठाएको बचत सञ्चालक र कर्मचारी मिलेर करोडौं रुपैयाँ अपचलन गरेको भेटिएको हो । संस्थाका प्रबन्ध निर्देशक राममान श्रेष्ठ करिब ५ करोड, अध्यक्ष पवन विर मालाकार ३ करोड र उपाध्यक्ष विद्या भुषण बज्राचार्य ३ करोड रुपैयाँ चलाएको सदस्यहरुको आरोप छ ।

सञ्चालक र कर्मचारीले लगेको पैसा फिर्ता गराउन सदस्यहरु लागि परेका छन् । उक्त रकम फिर्ता भए संस्था सञ्चालन हुने सदस्यहरुको भनाई छ ।

सञ्चालक र कर्मचारी मिलेर संस्थाको करोडौं रुपैयाँ अपचलन गरेको भेटिएपछि सदस्यहरुले संघीय सरकार अन्तर्गतको सहकारी विभाग उजुरी दिएका थिए । बचत र्फिता पाउँ भनि ५२ जना सदस्यहरुले विभागमा उजुरी दिएका थिए । तर, विभाग अन्तर्गतको नियमन संस्था नभएका कारण विभागले बागमती प्रदेश सहकारी मन्त्रालयलाई चिठी काटी कारबाहीको लागि पत्राचार गरेको थियो ।

उता बागमती प्रदेश सहकारी मन्त्रालयले पनि सहकारी संस्थाको बारेमा अनुगमन गरेको थियो । तर, अनुगमनमा कुनै पनि सञ्चालक समिति सम्पर्कमा नआएको मन्त्रालयले जनाएको छ । सञ्चालक समिति सम्पर्कमा नआएपछि मन्त्रालयले महानगरिय प्रहरी परिसर टेकु काठमाडौंलाई ठगीको मुद्दामा कारबाही गर्न पत्राचार गरेको थियो । २०७७ पुष २३ गते पत्राचार गर्दै उजुरीको ३७ पाना र सञ्चालक समितिको २ पाना विवरण सहित परिसरलाई पत्राचार गरेको थियो ।

महानगरिय प्रहरी परिसर टेकुले उक्त सहकारीका सञ्चालकलाई ठगीको मुद्दामा कारबाही गर्न माघ १० गते महानगरिय प्रहरी वृत लैनचौरलाई पत्राचार गरेको थियो । प्रहरी वृतबाट आवश्यक कारबाही सुरु गरेको छ । वृतले आज पिडित सदस्य र सञ्चालक समिति बीच छलफल राखेको एक सदस्यले सहकारीखबरलाई जानकारी गराए ।