नवकान्तिपुर सहकारीको चौथो चरणको विस्तारित मञ्च तथा सदस्य अन्तरक्रिया सम्पन्न

काठमाडौं : नवकान्तिपुर बचत तथा ऋण सहकारी संस्था लिमिटेडले चौथो चरणको विस्तारित मञ्च तथा सदस्य अन्तरक्रिया सहितको सहकारी शिक्षा कार्यक्रम सम्पन्न गरेको छ । संस्थाको कार्यक्षेत्र अन्तर्गत काठमाडांै महानगरपालिका वडा नं. १०, ११, १२, १३, १४, ३१, ३२ तथा भक्तपुर र ललितपुर जिल्ला क्षेत्रबाट प्रतिनिधिमूलक सदस्यहरुको सहभागितामा सम्पन्न गरेको हो ।

संस्थाका अध्यक्ष शिव प्रसाद सिटौलाको अध्यक्षतामा सम्पन्न उक्त कार्यक्रममा उल्लेखित क्षेत्रका सदस्यहरुको उल्लेख्य सहभागीता रहेको थियो । कार्यक्रममा संस्थाको सञ्चालक समितिका पदाधिकारी तथा उच्च व्यवस्थापनमा रहेका पदाधिकारीहरुले सदस्यहरुसँग अन्तरक्रिया गरेका थिए ।

कार्यक्रममा संस्थाको डिजिटल पेमेण्ट पार्टनर एफ वान सफ्टका प्रतिनिधिबाट डिजिटल शिक्षा प्रदान गर्दै डिजिटल कारोबार गर्दा सदस्यहरुले अपनाउनुपर्ने सावधानी, यसको जोखिम लगायतका बारेमा जानकारी गराएका थिए ।

त्यस्तै कार्यक्रमका प्रमुख प्रशिक्षक राष्ट्रिय सहकारी बैंकका तालिम अधिकृत नवकुमार अधिकारीले सहकारीको विकासक्रम, सहकारीको मूल्य, मान्यता र सिद्धान्त, संस्था सञ्चालनमा सदस्यहरुको भूमिका, संस्थाका सञ्चालकहरुले संस्थामा पुर्याउनुपर्ने योगदानको बारेमा चर्चा गरेका थिए ।

साथै प्रशिक्षक अधिकारीले बचतको महत्व तथा यसको परिचालन, ऋणको परिचालनसहित उद्यमशिलतामा सदस्यले खेल्न सक्ने भूमिका, बचतको महत्व, उद्यमशीलता विकासमा ऋणको परिचालन, डिजिटल कारोबार र यसमा अपनाउनुपर्ने सावधानीहरु, सहकारी र अन्य बैंक वित्तीय संस्था बीचको भिन्नता, मुद्रास्फिती र यसले सदस्यहरुको दैनिकिमा पार्ने प्रभाव, नियमित बचत र सहकारीमा यसको महत्व लगायतका बिषयमा सदस्यहरुलाई वित्तीय शिक्षा प्रदान गरेका थिए ।

कार्यक्रममा संस्थाका अध्यक्ष शिव प्रसाद सिटौलाले संस्थाको २०८१ असोज मसान्त सम्मको वित्तीय विवरण सदस्यहरुमाझ प्रस्तुत गर्दै संस्थाका विभिन्न सेवाहरुको बारेमा जानकारी गराएका थिए ।