वडा वडामा सेवा केन्द्र विस्तार गर्दै सिवाईसी साकोस, एकै दिन दुई नयाँ सेवा केन्द्र

बागलुङ : बागलुङको सिवाईसी बचत तथा ऋण सहकारी संस्थाले जैमिनी नगरपालिकामा एकै दिन थप दुई वटा सेवा केन्द्र विस्तार गरेको छ । बागलुङका सबै स्थानिय तहमा सेवा विस्तार गरेको सहकारीले वडा स्तरमा सेवा विस्तार थालेको हो ।

सोमबार बागलुङको जैमिनी नगरपालिका–७ जैदीको चौर र वडा नम्बर ६ अर्जेवाको ओख्लेमा १५ औं र १६ औं सेवा केन्द्र विस्तार गरेको हो ।

जैमिनी नगरपालिकाको सेवा केन्द्र उद्घाटन गर्दै नगरप्रमुख इन्द्रराज पौडेलले सहकारी मध्य सिवाईसी जिल्लाको फरक पहिचान बोकेको सहकारी रहेकोले सदस्यको सन्तुष्टीको लागी सहकारी क्रियाशिल रहेको बताउनु भयो । कार्यक्रममा नेपाली काग्रेसका जिल्ला सचिव नवराज पौडेल, जैमिनी नगरपालिका वडा नम्बर ८ का वडा अध्यक्ष विजय अधिकारी, सिवाइसी साकोसका संचालक कृष्ण रिजाल, शेयर सदस्य दिपेन्द्र अधिकारी लगायतले मन्तव्य राख्नुभएको थियो ।

सिवाईसी बचत तथा ऋण सहकारी सस्थाका अध्यक्ष चण्डि प्रसाद शर्मा पौडेलको अध्यक्षतामा सम्पन्न कार्यक्रममा स्वागत जैदी सदस्य सेवा केन्द्रका संयोजक मोहराज शर्मा र संचालन हरीनारायण पौडेलले गर्नु भएको थियो ।

१६ औं सदस्य सेवा केन्द्र अर्जेवाको उद्घाटन गर्नुहुँदै अध्यक्ष शर्मा पौडेलले सिवाईसी साकोस दुर दराजका सबै नागरिकलाई वित्तीय र गैर वित्तीय सेवा दिन सहकारी स्थापना भएको बताउनु भयो । बचत गर्ने बानीको विकास नहुँदा गरिबी झेल्नु परेकोले गरिबी अन्तको लागि सहकारीले काम गर्ने बताउनु भयो ।

कार्यक्रममा नेपाली कांग्रेस बागलुङका जिल्ला सचिव नवराज शर्मा, जनशिक्षित माविका प्रअ नारायण चालिसे, सिवाइसी साकोस केन्द्रीय संचालक कृष्ण प्रसाद रिजाल, जैमिनी ६ का सदस्य केशवराज शर्मा, पत्रकार सुजन प्रेमी लगायतले शुभकामना मन्तव्य व्यक्त गर्नुभएको थियो ।

बागलुङ जिल्लाका १६ स्थानमा सेवा विस्तार गरेको सहकारीले आगामी २१ र २२ गते म्याग्दी र पर्वतमा सेवा केन्द्र विस्तारको तयारी गरेको अध्यक्ष पौडेलले बताउनु भयो ।

१३ हजार ४ सय ७७ शेयर सदस्य रहेको सहकारीमा शेयर पूँजी २४ करोड ६ लाख ४० हजार, बचत १ अर्ब २७ करोड १६ लाख ३९ हजार रहेको भने कुल पूजी १ अर्ब ७२ करोड ३ लाख २५ हजार रहेको छ । सेवा केन्द्र उद्घाटनक्रममा अर्जेवा र जैदीमा एकै दिन ७५ जना शेयर सदस्य बनेका थिए ।