फागुन १५ मा राष्ट्रिय सहकारी बैंकको साधारणसभा

ललितपुर । राष्ट्रिय सहकारी बैंक लिमिटेडको १२ औं वार्षिक साधारणसभा ०७२ फागुन १५ गते शनिवार काठमाडौंको भृकुटी मण्डपमा हुने भएको छ ।
बैंक सञ्चालक समितिको मंगलवार बसेको सञ्चालक समितिको वैठकले उक्त दिन साधारणसभा गर्ने निर्णय गरेको हो । यस अगाडि मंसिर २६ गतेका लागि तोकिएको साधारणसभा मधेसमा देखिएको असहज परिस्थितिका कारण स्थगित गरिएको थियो ।
साधारणसभाले गत आर्थिक वर्षको प्रगति तथा आर्थिक प्रतिवेदन पारित गर्नुका साथै चालु आर्थिक वर्षको प्रस्तावित योजना तथा बजेट पारित गर्ने जनाइएको छ । यस्तै साधारणसभामा बैंकका शेयर सदस्य सहकारी संघ संस्थाहरुलाई १३ प्रतिशत लांभाश वितरणका लागि प्रस्ताव लगिने बैंकका अध्यक्ष रमेशप्रसाद पोखरेलले जानकारी दिए ।
मुलुकभरका सबै सहकारी सघसंस्थाहरुको एक मात्र सहकारी बैंकमा हाल ८ हजार शेयर सदस्य, ७० करोड शेयर रकम, ९ अर्ब ५८ करोड निक्षेप, ४ अर्ब ५० करोड लगानी रहेको बैंकका प्रवन्ध सञ्चालक के.बी.उप्रेतीले जानकारी दिए । बैंकले ३५ वटा शाखा र केन्द्रीय कार्यालयबाट करिब ११ अर्बको कुल कारोबार गरेको छ ।