सहकारीको व्यवस्थापनपछि श्रमिकमाझ उत्साह

रसुवा, ११ पुस । श्रमिकको हितका लागि धुन्चेमा पहिलो पटक सहकारी संस्था गठन भई कार्यसञ्चालन भएपछि यहाँका श्रमिकमाझ उत्साह बढेको छ ।
श्रमिकले आयआर्जन गरेका थोर बहुत रकम जम्मा गरी बचत तथा ऋणको माध्यामबाट जीवनोपार्जनमा सहज बनाउने उद्देश्यले संरक्षण बचत तथा ऋण सहकारी संस्था सञ्चालनमा ल्याइएको अध्यक्ष लामा कार्पु घलेले बताउनुभयो ।
उक्त सहकारीमा १५० भन्दा बढी श्रमिक आबद्ध भई नियमित रु १०० जम्मा गर्ने परिपाटीले आफूलाई आवश्यक पर्दा ठूूलै गर्जो टर्ने स्थिति सिर्जना भएको श्रमिक याकबहादुर लिम्बूले बताउनुभयो ।
यसैबीच जिल्लामा निर्माण हुने झोलुङ्गे पुल गुणस्तरीय बनाउन अगुवा कामदारलाई प्रशिक्षण दिइएको छ ।
जिल्ला विकास समिति रसुवाका अनुसार यार्सा र भोर्ले गाविसमा निर्माण हुने चार झोलुङ्गे पुल निर्माणका लागि १६ जना अगुवा कामदारलाई दक्ष बनाइएको हो ।