१८ वटा सहकारीको दर्ता खारेज

राजविराज । लामो समयसम्म कुनै आर्थिक कारोबार नगरेका सप्तरी र सिरहाका १८ वटा सहकारी संस्थाको दर्ता आर्थिक वर्ष २०७०÷७१ मा खारेज गरिएको छ ।
सहकारी डिभिजन कार्यालय लहानले सप्तरीका १२ र सिरहाका छवटा संस्थाको दर्ता खारेज गरेको जनाएको छ । दर्ता गराएर पनि लामो समयसम्म कुनै कारोबार नगरेको देखिएकाले ती संस्थाको दर्ता खारेज गरिएको सहकारी डिभिजन कार्यालयका सहायक सहकारी निरीक्षक फणीन्द्र विश्वकर्माले बताए ।
आव २०७०÷७१ मा सप्तरीमा बचत सहकारी १२ र कृषि सहकारी संस्था ३१ र सिरहामा बचत सहकारी नौ, कृषि सहकारी संस्था ४६, मत्स्य सहकारी संस्था एउटा र बहुद्देश्यीय सहकारी संस्था एउटा दर्ता भएको बताइएको छ ।
योसँगै सप्तरीमा सहकारीको सङ्ख्यामा अब ५९१ वटा पुगेको छ । सिरहामा सहकारी संस्थाको सङ्ख्या ६३१ पुगेको छ । सहकारी डिभिजन कार्यालयले सप्तरी र सिरहालाई कार्यक्षेत्र बनाएर काम गर्दैआएको छ ।