कारोबार बढाउँदै सिर्जनशील साकोस

व्यक्तिगत जमानीका आधारमा सहकारीबाट एक लाखसम्म ऋण लिनेको सङ्ख्या ५ सय २२ , एक लाखभन्दा माथि ऋण लिने सदस्य ९१ जना रहेका छन् ।

कञ्चनपुर, ११ असोज । सिर्जनशील बचत तथा ऋण सहकारी संस्था झलारी–७ ले आव ०७१/७२ को हालसम्म एक करोड ६४ लाख ७ सय ७७ रुपैंया निक्षेप सङ्कलन गरेको छ ।

आव ०७०÷७१ मा सहकारीले ९७ लाख ४१ हजार ७२ निक्षेप सङ्कलन गरेको थियो । आज आयोजित सातौँ वार्षिक साधारणसभामा आयव्यय प्रतिवेदन प्रस्तुत गर्दै सहकारीका सचिव मदनराज भट्टले बचत निक्षेपमा ९५ लाख ७१ हजार ४ सय ९६ रुपैंया र अन्य निक्षेपमा ६८ लाख २९ हजार २ सय ८१ सङ्कलन भएको बताए ।

सो सहकारीले सात वर्षको अवधिमा संस्थामा आबद्ध सदस्यलाई १६ करोड ३२ लाख छ हजार ५ सय ७ रुपैंया आयआर्जनका कार्यका लागि ऋण लगानी गरेको छ । लगानी गरिएको रकममध्ये ११ करोड ६१ लाख पाँच हजार ६५ रकम असुल भइसकेको छ ।

सहकारीको एक वर्षभन्दा बढी भाका नाघेको ऋण सात हजार २ सय ५० रुपैंया रहेको छ । जुन कुल लगानीमा रहेको ऋणको शून्य दशमलव १ प्रतिशत रहेको छ । सहकारीले चालु आवको हालसम्म खुद नाफा २४ लाख ८१ हजार १ सय ५९ रुपैंया रहेको छ । सहकारीको सेयर पुँजी गत वर्ष ५० लाख ५६ हजार रहेकामा चालु आवमा बढेर ७० लाख ४७ हजार एक सय पुगेको छ ।

संस्थाको भावी योजनाअनुसार तीन करोड बराबरको सेयर निस्कासन गर्ने, ऋण लगानीको दरलाई आठ करोड पु¥याउने र भाका नाघेको कर्जालाई शून्य प्रतिशतमा झार्नेलगायत रहेको छ । आव ०६४/६५ मा विधिवत् रूपमा दर्ता भई सञ्चालनमा आएको सहकारीले झलारी, पिपलाडी, कृष्णपुर, देखतभूली र दैजीमा कार्य गर्दै आएको छ ।

सहकारीले कृष्णपुर र दैजीमा सेवा केन्द्रसमेत सञ्चालनमा ल्याएको छ । सहकारीले सातौँ साधारणसभादेखि बचत फिर्ता कार्यक्रमसमेत सञ्चालनमा ल्याएको छ । यस सहकारीमा हालसम्म एक हजार ६ सय ६५ जना सदस्य आबद्ध रहेका छन् ।