सहकारी बजार दशैं पछि सञ्चालमा आउने

काठमाडौं, ९ असोज । आठ केन्द्रीय सहकारी संघ र सहकारी विभागको आर्थिक सहयोगमा काठमाडौंको शान्तिनगरमा सहकारी बजार सञ्चालनमा आउने भएको छ । केन्द्रीय तरकारी तथा फलफूल सहकारी संघले दिएको जानकारी अनुसार दशैं र तिहारको बीचदेखि यो बजार सञ्चालनमा आउने भएको हो ।
दशैंलाई लक्षित गरी सहकारी बजार सञ्चालनमा ल्याउने भनिए पनि सजावटको काम नसकिएको भन्दै बजार सञ्चालनमा ढिलाइ भएको संघका अध्यक्ष विनोद पराजुलीले जानकारी दिए । हाल १० वटा स्टलबाट बजार सञ्चालनमा आएको भन्दै उनले बजारको स्थापनका लागि आवश्यक प्रक्रिया पु-याएपछि दशैंलगत्तै बजार सञ्चालनमा आउने उल्लेख गरे । सहकारी संस्थाहरुका उत्पादनहरुलाई प्रोत्साहन तथा प्रवद्र्धन गर्ने उद्देश्यले बजार सञ्चालनमा ल्याउने तयारी गरिएको छ ।  ६० वटा सहकारीका स्टल रहने गरी सञ्चालनमा आउन लागेको सहकारी बजार असोज ४ गते औपचारिक रुपमा सुरु गर्ने भनिए पनि आवश्यक तयारी पूरा नभएको भन्दै स्थगित गरिएको हो । सहकारी बजार सञ्चालनका लागि कृषि तथा उत्पादनसँग आबद्ध भएका केन्द्रीय सहकारी संघहरु र सहकारी विभागको आर्थिक सहयोगमा काठमाडौंको शान्तिनगरमा बजार सञ्चालनमा ल्याइएको हो ।