नेपाल लायन बहुउद्देश्यीयद्धारा १८ करोड ७८ लाख ५८ हजार रुपैयाँ ऋण लगानी

काठमाडौं, २२ भदाै । त्रिपुरेश्वरमा रहेको नेपाल लायन बहुउद्देश्यीय सहकारी संस्था लिमिटेडको १४ औं बार्षिक साधारणसभा सम्पन्न भयो । सभामा अध्यक्ष कुबेरबहादुर राउतले संस्थाले सेयर पूँजी ३ करोड ९ लाख ७० हजार रुपैयाँ पुगेको, निक्षेप संकलन १७ करोड ४६ लाख ४ हजार रुपैयाँ पुर्याउन सफल भएको जानकारी गराउनुभयो ।

त्यस्तै ऋण लगानीतर्फ १८ करोड ७८ लाख ५८ हजार रुपैयाँ रहेको र असूली सन्तोषजनक रहेको सभामा जानकारी गराउनुभयो । उहाँले भाखा नाघेका पुराना सबै ऋण समेत यस आर्थिक बर्षमा उठाउन संस्था सफल भएको जानकारी गराउनुभयो । संस्थाले यस बर्ष ३६ लाख ३९ हजार रुपैयाँ खुद मुनाफा आर्जन गर्न सफल भएको सभामा जानकारी दिइयो । यो नाफा आयकर भुक्तानी पछिको नाफा हो । आयकरवापत संस्थाले ९ लाख ९ हजार रुपैयाँ दाखिला गरिसकेको छ भने ९ लाख ९ हजार जगेडा कोषमा छुट्याएको छ ।

त्यस पछिको २७ लाख ३० हजार रुपैयाँ संचिति मुनाफा बाँकी रहेको र सो संचिति मुनाफाबाट सदस्यहरुलाई १० प्रतिशत लाभांश वितरणको प्रस्ताव समेत सभाले स्वीकृत गरेको थियो । संस्थाले कर्मचारीको मनोवल बढाउन ३ महिनाको प्रोत्साहन भत्ता दिने व्यवस्था गरिएको पनि सभामा जानकारी दिइएको थियो ।

संस्थासँग विभिन्न शिर्षक अन्तर्गत १ करोड ३ लाख ४६ हजारको कोष रहेको जानकारी दिइयो । यो संस्थाको आर्थिक स्थिति सुदृढ र सवल छ भन्ने कुरा कोषको व्यवस्थाले इंकित गरेको पनि अध्यक्ष राउतले जानकारी दिनुभयो । संस्थाले यसबर्ष मितेरी सहकारी कार्यक्रम सञ्चालन गर्ने जनाएको छ । उक्त कार्यक्रमले काठमाडौंका समान प्रकृतिका सहकारीहरु तथा व्यवसायिक प्रतिष्ठानसँग अनुभव तथा भविष्यको लागि आवश्यक पर्ने राम्रो योजनाहरुमा सँगसँगै कार्य गर्न मद्दत पुग्ने विश्वास राखिएको छ ।

सभामा संस्थाका उपाध्यक्ष डा. जयहरि राज पाण्डेले सदस्यको आर्थिक समृद्धिमा सहकारीको भूमिका महत्वपूर्ण हुने भएको बताउँदै आफूहरु सहकारीसँग जोडिन पाएकोमा खुशि व्यक्त गर्नुभयो । सभामा लेखा समितिका संयोजक देबराज सुवेदीले प्रतिवेदन प्रस्तुत गर्नुभएको थियो भने सदस्यहरुले संस्थाको आव २०७१÷०७२ को प्रतिवेदन, आ.ब. २०७१÷०७२ को बार्षिक बजेट र लेखा परिक्षकको नियुक्ती तथा पारिश्रमिक तोक्ने प्रस्ताव सदस्यहरुद्वारा पारित गरिएको थियो ।
त्रिपुरेश्वर आसपासका स्थानीय र व्यवसायिक व्यक्तिहरु सदस्य रहेको उक्त संस्थामा १२४३ सेयर सदस्यहरु रहेका छन । संस्थाले आफ्ना सदस्यहरुलाई रेमिटान्सलगायत आधुनिक र कम्प्यूटराइज्ड सेवा उपलब्ध गराउँदै आएको छ । यसैबीच संस्थाले १४ औं वार्षिक साधारणसभाकै अवसर पारेर सभास्थलमा रक्तदान कार्यक्रमको समेत आयोजना गरेको थियो । उक्त रक्तदान कार्यक्रममा करिब तीन दर्जन सदस्यहरुले रक्तदान गरेका थिए ।