ग्यालरी म्यागजिनको विशेष अंक विमोचन

काठमाडौं । सूचना तथा संचारमन्त्री डा. मिनेन्द्र रिजाल तथा भारतीय राजदूत रणजीत रायद्वारा ग्यालरी म्यागजिनको नेपाल सम्बन्धि विशेष अंक बुधवार विमोचन गरिएको छ ।

संसारभरका उत्कृष्ट संग्राहलय तथा ग्यालरीहरुको सौजन्यमा भारतबाट प्रकाशित ग्यालरी म्यागजिनको विशेष अंकमा नेपालको कला र संस्कृति समेटिएको छ । नेपालको कला, संस्कृतिबारे बुझ्नुको साथै नेपाली कलाकार तथा लेखकसँग अन्तवार्ताको लागि केही महिनाअघि नेपाल आएकी बीणा सरकारले भनीन्, “नेपालको कला र संस्कृति सम्बन्धि विशेष अंक प्रकाशन गर्ने योजना बन्नुभन्दा अघि २ पटक म नेपाल आएको थिएँ । हिमाली दृश्यले भरिपूर्ण नेपाल ट्रेकिङ तथा दक्षिण एसियाको एक महत्वपूर्ण पर्यटकीय गन्तव्यको रुपमा प्रख्यात रहेको कुरा मलाई सुनाइन्थ्यो तर त्यो भन्दा अझ चम्किला केही कुरा नेपालमा नै छ भन्ने कुरा मलाई थाहा थियो । ग्यालरीको यस अंकमा नेपाली जीवनशैलीको जाज्वल्यमान तस्विर झल्किने नेपालका कला र संस्कृतिको विविधतालाई उजागर गरिएको छ ।”

कार्यक्रममा भारतीय राजदूत रणजीत रायले भन्नुभयो, “राजनीतिक तथा द्विपक्षीय सम्वन्धभन्दा धेरै बढी कुराहरुमा नेपाल र भारत गाँसिएका छन् । सांस्कृतिक समानतामा आधारित जनस्तरको हाम्रो सम्वन्ध अद्वितीय र बहुआयमिक छ । नेपालको कला र संस्कृतिलाई अन्र्तराष्ट्रियकरण गरी प्रोत्साहित गर्नको लागि सो सम्बन्धि विशेष अंक प्रकाशन गर्ने सत्प्रयासप्रति म बीणा सरकारलाई हार्दिक धन्यवाद दिन चाहन्छु । यो नेपाल–भारत सहकार्यको उदाउँदो परिणाम हो ।”
सूचना तथा संचारमन्त्री तथा कार्यक्रमका प्रमुख अतिथि डा. मिनेन्द्र रिजालले नेपाल र भारतबीचको सांस्कृतिक सम्बन्धमा नयाँ आयाम थप्नुको साथै अन्र्तराष्ट्रिय समुदायलाई नेपालको सांस्कृतिक विविधता तथा भारतसँगको बलियो सम्बन्धबारेमा जानकारी मिल्ने बताए ।

नेपालका प्रख्यात कविहरुका छानिएका कविताहरुमा सांगितिक समर्पणअघि प्राध्यापक डा. अभि सुवेदी, कलाकर्मी संगीता थापा, प्रख्यात गायिका आनी चोयिङ ड्रोल्मा र बीणा सरकार एलियासबीच नेपालको कला र संस्कृति बारेमा जीवन्त छलफल भएको थियो । डा. तुलशी दिवस, प्रा. सुवेदी, मोमिला जोशी र मञ्जु काँचुलीले बाचन गरेका कवितामा नेपालका सारंगीवादक श्याम नेपालीले साथ दिएका थिए ।

बीपी कोइराला भारत–नेपाल प्रतिष्ठानका सचिव अभय कुमारले ग्यालरी म्यागजिनमा नेपालको कला र संस्कृति सम्बन्धि विशेष अंक प्रकाशन गर्ने सत्प्रयासप्रति बीणा सरकारलाई हार्दिक धन्यवाद दिए । “ग्यालरीको यो बहुप्रतिक्षित अंकको शुभारम्भ आयोजना गर्न पाउँदा मेरो खुशीको कुनै सीमा छैन । यो सफल गराउँने धैर्यता र लगनशीलताप्रति बीणा सरकारलाई आभार प्रकट गर्दै म्यागजिनमा समेटिएका नेपालका ४३ जना नै कलाकार, कवि तथा लेखकहरुमा म बधाइ ज्ञापन गर्दछु ।” उनले भने ।