राष्ट्रिय संघमा सहमतीको सम्भावना न्यून

काठमाडौं, २१ साउन । राष्ट्रिय सहकारी संघमा आगामी नेतृत्वका लागि सहमतीको सम्भावना न्यून बन्दै गएको छ ।
पटक पटक वार्ता बसे पनि सहमती हुन नसक्दा सहमतीको सम्भावना न्यून बन्दै गएको हो ।

प्रमुख तीन राजनीतिक दल निकटका सहकारीकर्मीहरुको आ–आफ्नै अडानका कारण सहमती बन्न सकेको छैन । कांग्रेस, एमाले निकटबाट अध्यक्षका लागि खुलीसकेका छन् भने एमाओवादीबाट खुलेको छैन । स्रोतका अनुसार एमाओवादी निकटका सहकारीकर्मीले बाँस्कोटा र बडाल दुबै अध्यक्षमा टेस्ट भैसकेकाले संघको नेतृत्व माओवादीलाई सुम्पन आग्रह गरेका छन् । त्यस्तै सहकारी राजनीतिमा कमजोर उपस्थिती देखिएको कांग्रेसले आगामी दिनमा सहकारी आन्दोलनलाई सशक्त रुपमा उभियाउन पार्टीगत रुपमा दबाब खेपेकाले नेतृत्व नछाड्ने पक्षमा देखिएको छ ।

एमाओवादी भने आफूलाई मुख्य मुख्य पद जसले दिन्छ त्यसैलाई सहयोग गर्ने बुझिएको छ । सहमतीका लागि मुख्य मुख्य व्यक्ति वार्तामा बस्ने भनिएपनि अझै बस्न सकेको छैन । एमाले निकटमा सहकारीकर्मीहरुले आफ्नो प्यानलले जित्ने भएका कारण आफ्नै अडान राख्दै आएको छ ।