विद्यालय तथा उच्च शिक्षामा सहकारी पाठ्यक्रम तयार, कार्यान्वयन हुने पक्का

काठमाडौं, १८ असार । सरकारले विद्यालय तथा उच्च शिक्षामा सहकारी विषयको पाठ्यक्रम ल्याउने अन्तिम तयारी गरेको छ ।

कक्षा ९, १०, ११, १२ र उच्च शिक्षाको पाठ्यक्रम तयारी गरी छलफल समेत गरेको छ । सहकारी तथा गरीबी निवारण मन्त्रालयको आयोजनामा विद्यालय तथा उच्च शिक्षामा सहकारी विषयको पाठ्यक्रम तयारी विषयक एक दिने कार्यशाला गोष्ठि आयोजना गरी छलफल गरेको हो ।

गोष्ठिको उद्घाटन गर्दै सहकारी तथा गरीबी निवारण मन्त्रालयका सचिव सुरेशमान श्रेष्ठले सहकारी शिक्षा अहिलेको आवश्यकता रहेको बताउदै पाठ्यक्रमलाई छिटो भन्दा छिटो कार्यान्वयन गर्न आवश्यकता रहेको बताए । सरकारले सहकारी प्रति खासै चासो नदेखाएको समेत उनले बताए । गोष्ठिमा आएका सल्लाह, सुझावलाई संकलन गरी पाठ्यक्रममा समावेश गरीने सहकारी मन्त्रालयले जनाएको छ ।

गोष्ठिमा पाठ्यक्रम विकास केन्द्रका उपनिर्देशक डा. वालकृष्ण रंजितले ‘कक्षा ९ र १० का लागि सहकारी व्यवस्थापन शिक्षाको पाठ्यक्रमको स्वरुप’ प्रस्तुत गरेका थिए । त्यस्तै उच्च माध्यामिक शिक्षा परिषद्का पाठ्यक्रम महाशाखा प्रमुख रामचन्द्र पाण्डेले ‘उच्च माध्यामिक शिक्षाका लागि सहकारी व्यवस्थापन विषयको पाठ्यक्रमको स्वरुप’ र प्रशासन विज्ञ प्रा.डा. श्रीकृष्ण श्रेष्ठले ‘उच्च शिक्षामा सहकारी व्यवस्थापन विषयको पठ्यक्रमको आवश्यकता र स्वरुप’ प्रस्तुत गरेका थिए ।

कक्षा ९ र १० को पाठ्यक्रम आगामी असार २५ गते कार्यान्वयनका लागि पेश हुँदैछ । यो पाठ्यक्रम कार्यान्वयन भएरै छाड्ने डा. रंजितले बताए । कार्यक्रममा विभिन्न सरकारी निकाय, राष्ट्रिय सहकारी संघ, विभिन्न केन्द्रिय सहकारी संघ, सहकारी बैंक लगायतको प्रतिनिधिहरु सहभागीता रहेको थियो ।