कृषि प्रविधिको विकासमा सहकारी उपयुक्त माध्यम

काठमाडौं । नेपाल राष्ट्र बैंकका गर्भनर डा. युवराज खतिवडाले युवामा कृषि प्रतिको मोह घट्दै जानु र विदेश पलायन हुनु अनिष्टको संकेत भएको बताएका छन् । झापाका दुई वटा साना किसान कृषि सहकारी संस्थाको व्यवस्थापन किसानलाई हस्तान्तरण गर्दै उनले कृषिमा मोह घट्दा गम्भिर आर्थिक समस्या उत्पन्न हुने बताएका हुन् ।
गभर्नर डा. खतिवडाले सतासीधाम र लखनपुर कृषि सहकारी सस्थाको व्यवस्थापन स्थानीय साना किसानहरुलाई हस्तान्तरण गरेका हुन् । यी सहकारी सस्थाहरु अनुसरण कार्यक्रमबाट प्रवर्धन भएका हुन् । कृषिलाई आफूले उच्च प्राथमिकता दिएको दावी पनि उनले गरेका छन् । यही कारण बैंकको शाखा उद्घाटन भन्दा साना किसानको कार्यक्रममा आफू सहभागि हुने गरेको उनले बताए ।
सामाजिक रुपान्तरण र आर्थिक रुपान्तरण सँगसँगै जाने कुरा भएकोले महिलाहरुको समविकासबाट मात्र विकास संभव हुने पनि उनले बताएका छन् । महिलाहरुलाई आर्थिकरुपले सवल बनाउनका लागि लगानी गर्न साना किसान विकास बैंकलाई उनले सल्लाह दिएका छन् । लघुकर्जा र साना किसान विकास बैंकले सञ्चालन गरेको कार्यक्रमले महिलाहरुलाई आर्थिक रुपमा सवल र आर्थिक निर्णयमा पहुँच बढाउन सहयोग पुर्याएको उनले बताए । सहकारी संस्थाले कृषि प्रविधिको विकास र व्यावसायिकरणमा आफ्नो क्षमता प्रदर्शन गर्नु पर्ने उनले बताए ।
साना किसान विकास बैंकका कार्यकारी अधिकृत जलन कुमार शर्माले बैंकले प्रवर्धन गरिएका साना किसान सहकारी संस्थाहरुको संख्या तीन सय ६५ पुगेको जानकारी दिए । गाउँको गरिब किसानको घरमा पुग्ने र तीनै गरीबले चलाएको यो कार्यक्रमले किसानको जीवनस्तर उकास्त महत्वपूर्ण भूमिका खेलेको बताए । बैंकका अध्यक्ष खेम बहादुर पाठकले यी संस्थाहरु मार्फत विपन्न तथा साना किसानहरुले पुँजी, सीप, प्रविधि र बजार सम्म सहज पहुँच पुगी उनीहरुको आर्थिक र सामाजिक विकासमा टेवा पुग्ने बताए ।