सहकारीको विवरण पेश गर्ने समय ७ दिन बाँकी

हेटौंडा : बागमती प्रदेश सरकारको नियमनमा रहेका सहकारी संघ संस्थाले वार्षिक विवरण पेश गर्ने समयअवधि एक साता मात्र बाँकी रहेको छ । माघ मसान्त सम्ममा वार्षिक प्रतिवेदन पेश गर्नुपर्ने समय भूमि व्यवस्था, कृषि तथा सहकारी मन्त्रालयले दिएको छ ।

आफ्नो क्षेत्राधिकारमा रहेका सहकारी संघ/संस्थालाई हरेक आर्थिक वर्षको माघ मसान्त सम्ममा वार्षिक विवरण पेश गर्न सूचना जारी गरेको हो ।

मन्त्रालयले नियमितरुपमा साधारण सभाको विवरण पेश नगर्ने सहकारी संघ/संस्थालाई प्रत्येक आर्थिक वर्षको ३ हजार रुपैयाँ जरिवाना गर्ने निर्णय गरेको छ । साथै नियमित लेखा परीक्षण नगर्ने, कर चुक्ताको प्रमाण पत्र नलिने र साधारण सभा नगर्ने सहकारी संघ संस्थाहरुलाई ३ हजार रुपैयाा देखि ५ हजार रुपैयाँ सम्म जरिवना गर्ने जनाएको छ ।

प्रदेश मन्त्रालयले जारी गरेका ऐन कानुनको पालना नगर्ने सहकारीलाई कानुनी दायरामा ल्याई कारबाही गर्ने मन्त्रालयले जनाएको छ ।

लगातार ३ आर्थिक वर्ष सम्म आफ्नो विवरण पेश नगर्ने सहकारी संघ/संस्थाको दर्ता समेत खारेजी गर्न सकिने कानुनी व्यवस्था रहेको छ ।