२३ वर्षमा महिला साकोस, विपन्न सदस्यलाई खाद्यान्न वितरण

इटही, २२ असोज

इटहरी–४ स्थित महिला बचत तथा ऋण सहकारी संस्था २३ वर्षमा प्रवेश गरेको छ । २३ औँ स्थापना दिवसको अवसरमा संस्थाले खाद्यान्न वितरण गरेको छ ।

संस्थाले दैनिक ज्याला मजदुरी गरेर गुजरा चलाउँदै आएका ४० जना सदस्यहरूलाई खाद्यान्न वितरण गरेको हो ।

७५ जना महिलाले १ लाख रुपैयाँ संकलन गरी सुरु भएको संस्थामा हाल १० हजार सदस्यहरू आवद्ध भएका छन् । संस्थाको कुल पुँजी ६५ करोड भन्दा बढी छ । संस्थाले ४२ करोड रुपैयाँ ऋण प्रवाह गरेको छ ।

संस्थाले व्यापार व्यवसाय, कृषि र शिक्षा लगायत क्षेत्रमा लगानी गर्दै आएको छ । बिनाधितो ५ लाख रुपैयाँ र धितोमा ६० लाख रुपैयाँसम्म लगानी गरिरहेको छ ।

खाद्यान्न वितरण कार्यक्रममा संस्थाकी अध्यक्ष अमृता शुब्बाले लकडाउनको कारण मजदुरी गर्न नपाएका आफ्ना शेयर सदस्यहरूलाई राहत वितरण गरिएको जानकारी दिनुभयो ।