मानवीय सेवामा विकूको योगदान, एकैदिन ३१० पिन्ट रक्त संकलन

गैंडाकोट (नवलपुर) : विकू बचत तथा ऋण सहकारी संस्था लिमिटेडले आफ्नो ३६औँ वार्षिक उत्सवको अवसरमा आयोजना गरेको बृहत् खुला रक्तदान कार्यक्रममा एकै दिन ३१० पिन्ट रगत संकलन गरेको छ।

मानवीय सेवाको भावनासहित आयोजना गरिएको रक्तदान कार्यक्रम कावासोती र गैँडाकोटमा एकैसाथ सञ्चालन गरिएको थियो। कार्यक्रममा सहकारीका सदस्य, कर्मचारी तथा सर्वसाधारणको उत्साहजनक सहभागिता रहेको थियो।

रक्तदान कार्यक्रममा सहभागी भई रक्तदान गर्ने सम्पूर्ण रक्तदातालाई संस्थाले उच्च सम्मानसहित हार्दिक धन्यवाद व्यक्त गरेको छ। संस्थाले सामाजिक उत्तरदायित्वअन्तर्गत विभिन्न मानवीय तथा सामाजिक सेवाका कार्यक्रमलाई निरन्तरता दिँदै आएको जनाएको छ।

विकू सहकारीले आफ्नो वार्षिक उत्सवलाई केवल संस्थागत गतिविधिमा सीमित नराखी समुदायसँग जोडिएका सामाजिक सेवामूलक कार्यक्रममार्फत मनाउँदै आएको छ।