सदस्यका गुनासा, सुझाव तथा सल्लाह संकलन गर्दै राष्ट्रिय सहकारी बैंक

काठमाडौं : राष्ट्रिय सहकारी बैंक लिमिटेडले ‘सदस्य भेटौँ, सदस्य सुनौँ’ भन्ने नारासहित सञ्चालन गरेको ‘मिट एन्ड ग्रिट’ कार्यक्रम मंगलबार न्यूरोड शाखामा सम्पन्न गरेको छ। सदस्य संस्थाहरूका गुनासा, सुझाव तथा सल्लाह संकलन गरी आगामी आर्थिक वर्षको बजेट तथा कार्यक्रममा समावेश गर्ने उद्देश्यले कार्यक्रम आयोजना गरिएको हो।

बैंकका सञ्चालक परितोष पौड्यालको अध्यक्षतामा सम्पन्न कार्यक्रमको सञ्चालन बागमती प्रदेश प्रमुख रमा घिमिरेले गरेकी थिइन्। कार्यक्रममा शाखा प्रमुख लोकेन्द्र के.सी.ले शाखाको वर्तमान अवस्था, चालु आर्थिक वर्षका गतिविधि तथा उपलब्धिबारे जानकारी गराएका थिए।

न्यूरोड शाखाअन्तर्गत रहेका १९ वटा सहकारी संघ/संस्थाका अध्यक्ष, सञ्चालक तथा व्यवस्थापन प्रमुखहरूको सहभागिता रहेको कार्यक्रममा सहकारी क्षेत्रको वित्तीय स्थायित्व, दिगोपन, वित्तीय सक्षमता अभिवृद्धि, सञ्चालन प्रभावकारिता, राज्यको नीति तथा सहकारी अभियानका विविध विषयमा छलफल भएको थियो।

सहभागीहरूले बैंकको सञ्चित घाटा न्यूनीकरणका लागि स्पष्ट कार्ययोजना आवश्यक रहेको, बजार विस्तारमार्फत व्यवसाय वृद्धि गर्नुपर्ने, सदस्य सहकारीहरूको क्षमता अभिवृद्धिमा जोड दिनुपर्ने तथा समस्याग्रस्त सहकारीहरूको समयमै पहिचान गरी जोखिम व्यवस्थापन गर्नुपर्ने सुझाव दिएका थिए। साथै, सबै सहकारी संस्थाको नीतिगत पहुँच सुनिश्चित गर्नुपर्ने विषयमा समेत जोड दिएका थिए।

कार्यक्रममा प्रदेश प्रमुख घिमिरेले बैंकले सञ्चालन गर्दै आएका सहकारी शिक्षा तथा तालिम, प्रत्येक शुक्रबार प्रदान गरिने परामर्श सेवा, नयाँ सदस्य अभिमुखीकरण, वित्तीय साक्षरता, शाखास्तरीय गोष्ठी तथा ‘एक सदस्य, एक कार्यक्रम’ लगायतका गतिविधिबारे जानकारी गराएकी थिइन्।

छलफलका क्रममा उठेका प्रश्न तथा जिज्ञासाको जवाफ दिँदै सञ्चालक पौड्यालले बैंकको वर्तमान अवस्था र आगामी योजनाबारे स्पष्ट धारणा राखेका थिए। बैंकले सबै सहकारीलाई एक सूत्रमा बाँधेर विद्यमान चुनौतीहरूको समाधान खोज्दै आगामी नीति तथा बजेटमार्फत कार्यक्रममा उठेका विषयहरूलाई सम्बोधन गर्ने प्रतिबद्धता व्यक्त गरेका थिए।