राष्ट्रिय सहकारी महासंघकी अध्यक्ष ओमदेवी मल्लको राजीनामा

काठमाडौं : राष्ट्रिय सहकारी महासंघ लिमिटेडकी अध्यक्ष ओमदेवी मल्लले पदबाट राजीनामा दिएकी छन्। शुक्रबार (फागुन २९ गते) महासंघको ३४औँ वार्षिक साधारणसभालाई सम्बोधन गर्दै उनले आफ्नो राजीनामा दिएकी हुन्।

मल्ल विगत करिब ६ महिनादेखि संयुक्त राज्य अमेरिकामा बस्दै आएकी छन्। गत पुसमा सम्पन्न महासंघको ३३औँ वार्षिक साधारणसभाभन्दा अघि स्वदेश फर्कने योजना बनाएर उनी अमेरिका पुगेकी थिइन्। तर स्वास्थ्यमा अपेक्षित सुधार नभएका कारण उनी साधारणसभामा उपस्थित हुन सकेकी थिइनन्। त्यसबेला उनले सभाका लागि शुभकामना सन्देश पठाएकी थिइन्।

राजीनामा पत्रमा मल्लले सहकारी क्षेत्रमा बढ्दो राजनीतिक तथा पार्टी हस्तक्षेपलाई आफ्नो पदत्यागको प्रमुख कारण बताएकी छन्। सहकारी संस्थाहरूमा राजनीतिक प्रभाव बढ्दै गएको भन्दै उनले त्यसले संस्थाको स्वतन्त्रता र कार्यसम्पादनमा असर परेको उल्लेख गरेकी छन्।

राजिनामामा पत्रमा भनिएको छ, ‘अध्यक्ष भएदेखि नै मलाई आन्तरिक तथा बाह्य रुपमा पूर्ण सहयोग प्राप्त भएन । राजनीतिक रुपमा एकलौटी सञ्चालक समितिको चयन भएपनि महासंघका हरेक वैठक पूर्व अनिवार्य रुपमा पार्टीको विभागिय प्रमुखसँग सल्लाह लिनु पर्ने, निर्णयहरु पार्टी हित अनुकुल हुनुपर्ने जस्ता दवावको कारण मैले स्वस्फूर्त रुपमा योजना अनुसार काम गर्न सकिन । महाप्रवन्धक नियुक्तीदेखि अन्य कार्यालयका महत्वपूर्ण काममा पनि अध्यक्षलाई स्वतन्त्र हिसावले काम गर्ने वातावरण बनेन् । यद्यपी टिमका केही साथीहरुको साथ सहयोग र कर्मचारीहरुको सकारात्मक कार्यशैलीका कारण केही महत्वपूर्ण कामहरु पनि भएका छन् । पार्टीको सहकारी विभागबाट भएको हस्तक्षेपले मानसिक रुपमा पनि निकै तनावमा भएँ । महासंघभित्र सबै राजनीतिक आस्था भएका सहकारीकर्मीहरुलाई मिलाएर लैजानुपर्छ भन्ने उद्देश्य राखेर अथक प्रयास गरेँ तर एउटै पार्टीका साथीहरु रहेको बोर्डमा रहेपनि असहयोगको अवस्था पनि भयो । आफ्नै साथीहरुको अपमान र हस्तक्षेपले गर्दा मानसिक रुपमा म कमजोर भएको थिएँ ।’

गत भदौमा परिवार अमेरिका जाने भनेपछि केही समयका लागि परिवारसँगै विदेशमा रहँदा उपचारसँगै तनाव पनि कम हुन्छ भन्ने परिवारको सल्लाह अनुसार अमेरिका आएको मल्लको राजिनामा पत्रमा उल्लेख छ। राजिनामामा भनिएको छ, ‘यहाँ आएपछि केही परिवर्तन हुन्छ किरु भन्ने लागेको थियो तर पार्टी नेतृत्वको दवावले नै होला महासंघका साथीहरुले पटक पटक राजिनामा पठाउन दवाव दिनुभयो । राजिनामा नदिए, अविश्वासको प्रस्ताव साधारणसभामा लगेर हटाउने धम्की पनि साथीहरुले दिनुभयो । मैले साधारणसभामा शुभकामना सन्देश पठाए । त्यसपछि पनि धेरै दवाव दिएको कारण म राजिनामा दिने निष्कर्षमा पुगे ।’