नयाँ सन्देश सहकारी समस्याग्रस्त घोषित, ऋण उठाएर बचत फिर्ता गराउन समिति गठन

काठमाडौं, ३० असोज

नयाँ सन्देश बचत तथा ऋण सहकारी संस्था समस्याग्रस्त घोषित भएको छ । सहकारी संस्थालाई व्यवस्थापन गर्न बुढानिलकण्ठ नगरपालिकाले समस्याग्रस्त सहकारी ब्यवस्थापन समिति गठन गरेको छ ।

संस्था बुढानिलकण्ठ नगरपालिका–५ मा रहेको छ । संस्थाले बचतकर्ता सदस्यहरुको रकम हिनामिना गरि संचालकको निजी स्वार्थका लागि दुरुपयोग गरेको सदस्यहरुले आरोप लगाएका छन् । बुढानिलकण्ठ नगरपालिकाको नियमनभित्र पर्ने यस संस्थाको ब्यवस्थापन गर्नका लागि नगरपालिकाले सात सदस्यीय ब्यवस्थापन समिति गठन गरी प्रक्रिया अघि बढाएको छ ।

समितिले संस्थाबाट ऋण लिएका सदस्यहरुलाई आफूले लिएको सावाँ, ब्याज सहित सूचना प्रकाशित भएको मितिले २१ दिन भित्र दाखिला गर्न अनुरोध गरेको छ । कार्यालयले कोही कसैले अटेर गरी दाखिला नगरेमा कानुन बमोजिम कारबाही गर्ने चेतावनी दिएको छ ।

यसैगरी समितिले सम्पूर्ण बचतकर्ता सदस्यलाई सूचना पाएको मितिले ३० दिन भित्र प्रमाण सहित रकम दावी गर्न समेत जानकारी गराएको छ ।
संस्थाको सम्पत्ति तथा दायित्व फरफारक गर्नका लागि सूचना प्रकाशित गरेको छ ।

संस्थाका अध्यक्ष सानु ठकुरी हिरासतमा छन् । संस्थाका सञ्चालकले २ हजार सदस्यको २५ करोड रुपैयाँ हिनामिना गरेको प्रारम्भिक अध्ययनले देखाएको छ ।