विवरण दाखिला गर्न सहकारी विभागको ताकेता, वार्षिक र मासिक विवरण बुझाउने म्याद तीन दिन बाँकी

काठमाडौं : सहकारी संस्थाहरुले बुझाउनु पर्ने विवरण सहकारी विभागमा नबुझाएपछि ताकेता गरेको छ ।

सहकारी विभागमा अनुसार २०७६/०७७ को वार्षिक विवरण र २०७७/७८ को हालसम्मको मासिक विवरण असोज मसान्तसम्म एकीकृत व्यवस्थापन सूचना प्रणालीमा दाखिला गरिसक्नु पर्ने छ ।

सहकारी ऐन २०७४ को दफा ७३(१)मा सहकारी संस्थाहरुले प्रत्येक वर्षको कारोबारको चौमासिक र वार्षिक प्रतिवेदन, लेखा परिक्षण प्रतिवेदन, वार्षिक कार्यक्रम, नीति तथा योजना, सञ्चालक समिति, साधारण सभा, सेयर लगायतको विवरण सहितको प्रतिवेदन तोकिएको समयमा रजिष्ट्रार समक्ष बुझाउनु पर्ने प्रावधान रहेको छ ।

त्यसैगरी सहकारी नियमावली २०७५ को नियम २८ को उपनियम (४) ले सहकारी संस्थाहरुले आफ्नो संस्थागत तथा व्यवसायिक कारोबारको विवरण विभागले तोकेको एकीकृत व्यवस्थापन सूचना प्रणालीमा प्रविष्ट गर्नुपर्ने प्रावधान छ ।

त्यस्तै बचत तथा ऋणको मुख्य कारोबार गर्ने सहकारी संस्थाको सुपरिवेक्षण, निरीक्षण तथा अनुगमन निर्देशिका २०७७ को दफा ३ ले प्रत्येक महिनाको ७ गतेभित्र मासिक, प्रत्येक चौमासिक अवधी व्यतित भएको १५ दिनभित्र चौमासिक र आर्थिक वर्ष व्यतित भएको १० दिनभित्र वित्तीय प्रतिवेदन रजिष्ट्रारले तोकेको ढाँचामा पठाउनु पर्दछ ।