कास्कूनको सत्रौं वार्षिक साधारण सभा सम्पन्न, विभिन्न व्यक्ति र संस्था सम्मानित

काठमाडौं, २४ असोज

काठमाडौं बचत तथा ऋण सहकारी संघ (कास्कून)ले एकै दिन स्थापना दिवस र बार्षिक साधारण सभा भर्चुअलरुपमा सम्पन्न गरेको छ ।

कार्यक्रममा शुभकामना मन्तव्य राख्दै  राष्ट्रिय सहकारी महासंघका अध्यक्ष मिनराज कंडेलले सहकारीमा कात्तिक १५ गतेदेखि लागु हुने सन्दर्भ ब्याजदर कार्यान्वयन गर्नै पर्ने बताउनुभयो ।  सहकारीले बढी ब्याज लिएर ठग्छन् भन्ने आरोपलाई निराधार सावित  गर्न पनि सन्दर्भ ब्याजदर कार्यान्वयन गर्नै उहाँको जोड थियो ।

“कात्तिक १५ बाट लागु हुने सहकारीको १४ दशमलव ७५ प्रतिशत ब्याजदर कार्यान्वयन गर्नै पर्छ । त्यसले सहकारीले बढी ब्याज लिन्छन्, ठग्छन् भन्ने आरोपलाई निराधार बनाउनु पर्ने छ ।” उहाँले  एक स्थानीय तह एक सहकारीको सदस्य नीति  अभियानको समेत सहमती रहेको विषय भएको भन्दै धेरैवटा संस्थाको सदस्यता लिने प्रवृतिले राम्रो नगर्ने बताउनुभयो ।

सदस्यताको विषय अदालतमा पुगेको हुनाले अदालतको फैसला पर्खन आग्रह गर्नुभयो  । उहाँले मन्त्रालयसंग कोभिडको समयलाई शुन्य समय मानेर एक वर्षसम्मलाई छुट दिनुपर्ने माग राखेको जानकारी दिनुभयो ।

संघले वार्षिक साधारणसभाको अवसर पारेर विभिन्न व्यक्ति तथा संस्थालाई सम्मानित गरेको छ  । संघले यस वर्ष सतुंगलको वेस्ट्रन  ऋतम्भरा बचत तथा ऋण सहकारीलाई उत्कृष्ट ब्यवसाय साकोस सम्मान प्रदान गरेको छ । यसैगरी  अधिक शेयर खरिद साकोस सम्मानबाट सत्कार बचत तथा ऋण सहकारी पुरस्कृत भएको छ । त्यसैगरी उत्कृष्ठ साकोस सम्मान चन्द्रागिरि बचत तथा ऋण सहकारीले पाएको छ भने अधिक बचत कारोबार साकोस सम्मान कोल्मतेश्वर बचत तथा ऋण सहकारीले पाएको छ ।

यो वर्ष कास्कून वर्ष ब्यक्ती अभियान्ता सम्मानबाट पूर्व लेखा समिति सदस्य हरिशरण थापा सम्मानीत हुनुभएको छ ।  उत्कृष्ठ कर्मचारी पुरस्काकार  कास्कूनका ब्यवस्थापक अरुण तिवारीले पाउनुभएको छ।

संस्थाका अध्यक्ष दिपक पनेरुको अध्यक्षतामा भएको कार्यक्रममा कोषाध्यक्ष निरञ्जन सेढाइले  संघको आर्थिक वर्ष २०७६/०७७ को  आर्थिक प्रतिवेदन प्रस्तुत गर्नुभयो ।

उहाँले संघमा ७ सय सदस्य, २ करोड ४३ लाख ९४ हजार शेयर पूंजी, ७२ करोड ८७ लाख बचत, २ करोड २४ लाख कोष तथा ९४ करोड कूल कारोबार भएको जानकारी दिनुभयो ।