सफा टोल बनाउने अभियानमा सिवाईसी साकोस

बागलुङ, २३ असोज

बागलुङको सिवाईसी बचत तथा ऋण सहकारी सास्थाले संस्थागत सामाजिक उत्तरादायित्व अन्तर्गत डस्टविन वितरण गरेको छ ।

सहकारीले ११ औं समृद्धि दिवसको अवसरमा बागलुङ नगरपालिका–४ को प्रगतीनगर टोल विकास संस्थालाई डस्टविन वितरण गरेको हो ।
स्वस्थ सफा सुन्दर टोल निर्माण अभियान बनाउने उद्देश्यले टोल विकास संस्थाको माग अनुसार अभियानमा संस्थाले सघाउ पुर्याएको हो ।

संस्थाले ९ हजार मुल्य बराबरका ३ वटा फलामका डस्टविन वितरण गरेको जनाएको छ । कार्यक्रममा संस्थाका अध्यक्ष चण्डीप्रसाद शर्मा पौडेलले सहकारीले बचत तथा ऋणको काममा मात्रै नभई समुदायमा सकारात्मक प्रभाव पार्ने गतिविधिमा सघाउ पुर्याउँदै आएको बताउनुभयो ।

कार्यक्रममा सहकारीका कोषाध्यक्ष सिता सापकोटा, बागलुङ चेम्बर अफकमर्सका सचिव तेजबहादुर कुँवर लगायतले मन्तव्य व्यक्त गर्नु भएको थियो ।

संस्थाले ३ वटा डस्टविन सहयोग गरेपछि रमेटार खानेपानी उपभोक्ता संस्था, चुत्रेनीवानेको पाखो सामुदायिक वन उपभोक्ता समितिले समेत टोल विकास संस्थालाई एक–एक थान डस्टविन सहयोग गरेको थियो ।

सहकारीले समृद्धि दिवसको अवसरमा जिल्लाका अन्य १० वटा सदस्य सेवा केन्द्रमा पनि विभिन्न कार्यक्रम गरी दिवस मनाएको छ ।

११ हजार ७ सय ७२ सदस्य, २२ करोड १ लाख ९३ हजार ५ सय सेयर पूँजी, १ अर्ब २७ करोड ९१ लख ७६ हजार बचत रहेको छ संस्थाको ९१ करोड ८ लाख ३ हजार ८ सय ६१ रुपैयाँ लगानी गरेको छ ।

दायित्व र हितकोष ६ करोड ७३ लाख ४० हजार ४ सय ६१ रुपैयाँ रहेको सहकारीको कुल सम्पत्ति १ अर्ब ७१ करोड ६० लाख २८ हजार २ सय ४२ रुपैयाँ छ । सहकारीको मुख्य कार्यालयसहित जिल्लाका ११ स्थानका सेवा केन्द्रमा ६६ जना जनशक्ति कार्यरत रहेका छन् ।