शिव शिखर सहकारीद्वारा कमलविनायकमा मार्ट सञ्चालन, उपत्यकामा ५० वटा मार्ट खोल्ने तयारी

काठमाडौं, १२ असोज

सम्पदाको शहर भक्तपुर कमलविनायकमा शिव शिखर बहुउद्देश्यीय सहकारी संस्थाले ‘गार्डेन मार्ट’ सञ्चालनमा ल्याएको छ । सोमबारबाट औपचारिक रुपमा ‘गार्डेन मार्ट’ सञ्चालनमा आएको हो । संस्थाले सञ्चालन गरेको यो दास्रो मार्ट हो । यसअघि संस्थाले डडेलधुराको बागबजारमा मार्ट सञ्चालन गरिसकेको छ ।

ललितपुरको ठैब, महाराजगञ्ज, किर्तिपुर, तुलसीपुर लगायतको ठाउँमा मार्ट सञ्चालनको अन्तिम तयारीमा रहेको संस्थाले जनाएको छ । संस्थाले निकट भविष्य मै ७७ जिल्लामै मार्ट विस्तार गर्ने संस्थाका मुख्य प्रबन्धक लिलानाथ गौमतले जानकारी दिनुभयो । काठमाडौं उपत्यकामा मात्रै ५० वटा मार्ट सञ्चालन गर्ने तयारी रहेको गौतमले जानकारी दिनुभयो ।
मार्टबाट सदस्य तथा स्थानीयले सुपथ मुल्यमा दैनिक उपभोग्य सामग्री सुपथ मुल्यमा पाउने उहाँले जानकारी दिनुभयो ।

केही समयअघि भक्तपुरको सल्लाघारी मुख्य कार्यालय रहेको शिव शिखर कृषि सहकारी संस्था र कौशलटारमा मुख्य कार्यालय रहेको शिखर दीप बहुउद्देश्यीय सहकारी संस्था बीच एकीकरण सम्पन्न गरेको थियो । दुई संस्था एकीकरण भई शिव शिखर बहुउद्देश्यीय सहकारी संस्थाको नामबाट कारोबार गर्न सहकारी विभागले साउन ४ गते एकीकरण प्रमाणपत्र प्रदान गरेको थियो । संस्थाको कार्यक्षेत्र काठमाडौं उपत्यकाको ३ जिल्ला सहित ३५ जिल्ला रहेको छ ।

चर्को मुल्यमा कमसल सामान खरिद गर्न बाध्य उपभोक्ताहरुका लागि सहकारीमार्फत सञ्चालन गरिएको मार्ट खुसीको कोसेली बन्ने गौतमले बताउनुभयो ।