बिन्धवासिनी साकोसका सदस्यले ५.५ प्रतिशत ब्याजदर मै कर्जा पाउने, ६ लाख ५० हजारसम्म कर्जा दिईने

काभ्रे, ११ असोज

अब बिन्धवासिनी बचत तथा ऋण सहकारी संस्थाका सदस्यले ५.५ प्रतिशत मै कृषि कर्जा पाउने भएका छन् । संस्थाका कर्जा लिन योग्यता पुगेका सबै सदस्यले यस्तो ५.५ प्रतिशत मै कृषि ऋण पाउने छन् ।

कर्जाको ब्याजदर भने ११.५ प्रतिशत पर्न आउँछ तर ऋणी सदस्यले भने ५.५ प्रतिशत मात्रै तिरे पुग्छ । जसअनुसार रोशी गाउँपालिकाले ५ र संस्थाले १ प्रतिशत ब्याज अनुदान दिन लागेको हो ।

संस्थाले रोशी गाउँपालिकासँग गत साता ब्याज अनुदान सम्झौता भएको थियो । सोही अनुसार संस्थाले सुचना जारी गरी सदस्यहरुलाई आव्हान गरेको छ । संस्थाले जारी गरेको सूचना अनुसार सम्बन्धीत वडा कार्यालय र भकुण्डे सेवा केन्द्रमा सम्पर्क गर्न अनुरोध गरेको छ ।
व्याज अनुदान कार्यक्रमबाट गाउँपालिका भित्रका कम्तिमा ६० जना युवा उद्यमीहरु लाभान्वीत हुनेछन् ।

उद्यम गर्न चाहने यूवाहरुले सहकारी मार्फत सहुलियतपुर्ण व्याजमा प्रति घरधुरी ६ लाख ५० हजारसम्म ऋण प्राप्त गर्न सक्नेछ । यो कार्यक्रम स्थानीय स्तरमा रोजगारी सृजना गर्न र कृषि तथा उद्यम विकासको क्षेत्रमा यूवाहरुलाई आकर्षण गर्न ल्याएको नमुना परीक्षण कार्यक्रम भएकोले यसको परीक्षणको आधारमा आगामी दिनमा थप विस्तार गर्न सकिने संस्थाले जनाएको छ ।