अब चियामा सहकारीको आफ्नै ट्रेडमार्क, २ वटा सहकारीले पाए अनुमती

गैंडाकोट, ८ असोज

नेपाली अर्थोडक्स चिया सर्टिफिकेसन ट्रेडमार्क कार्यान्वयन निर्देशिका, २०७४ ले तय गरेका मापदण्ड र आचार संहिता पालना गरेका २ वटा चिया सहकारीलाई ट्रेडमार्क प्रयोग गर्न इजाजत पाएका छन् ।

चिया सहकारीसहित १२ वटा चिया उद्योगलाई ट्रेडमार्क प्रयोग गर्न इजाजत दिएको हो । श्री उच्च पहाडी चिया उत्पादक सहकारी संस्था, इलाम र श्री सिंहदेवि चिया उत्पादक सहकारी संस्था, तेह्थुमले ट्रेडमार्क प्रयोग गर्न इजाजत पाएका हुन् । कृषि तथा पशुपन्छी विकास मन्त्री घनश्याम भुसालले उक्त उद्योगहरूको अर्थोडक्स चियाको ट्रेडमार्क औपचारिक रुपमा कार्यान्वयनमा ल्याएका हुन् ।

ट्रेडमार्क प्रयोगका लागि ४२ वटा चिया उद्योगहरूले निवेदन पेश गरेका थिए । यो सँगै विगत एक दशकभन्दा लामो अवधि देखि छलफलमा रहेको नेपाली चियाको ट्रेडमार्क कार्यान्वयनमा आएको छ । पहिलो चरणमा ट्रेडमार्क प्रयोगका लागि प्रक्रिया पुरा गरी ट्रेडमार्क प्रयोग गर्न इजाजत प्राप्त दिएको हो ।