सहकारीले लिने सेवा शुल्क पनि तोकिदै, आन्तरिक छलफलमा सहकारी विभाग

गैंडाकोट, ८ असोज

सहकारी विभागले दोस्रो पटक सहकारीमा ब्याजदर तोकेसँगै सेवा शुल्क पनि तोक्ने तयारी गरेको छ । सदस्यलाई कर्जा प्रवाह गर्दा चर्को सेवा शुल्क लिने गरेको गुनासो बढेपछि विभागको यसतर्फ तयारी गरेको हो ।

सहकारी विभागका अनुसार सेवा शुल्क तोक्ने विषयमा छलफल भईरहेको र छिट्टै टुंगोमा पुगिने बताएको छ । कानुनले सेवा शुल्क तोक्ने अधिकार रजिष्ट्रारलाई दिएको छ ।

सेवा शुल्क तोक्ने विषयमा छलफल भईरहेको र उपयुक्त समयमा उपयुक्त निर्णय हुने सहकारी विभागका रजिष्ट्रार डा. टोकरोज पाण्डेले जानकारी दिनुभयो । ‘केही सहकारीले चर्को सेवा शुल्क लिने गरेको पटक पटक गुनासो आउने गरेको छ’, उहाँले भन्नुभयो, ‘सेवा शुल्क निर्धारणको विषय हामी छिट्टै टुंगोमा पुग्नेछौं ।’

विशेष गरी शहर केन्द्रित सहकारी संस्थाहरुले ३ प्रतिशतसम्म सेवा शुल्क, अन्य विभिन्न शुल्क समेत सदस्यबाट लिने गरेका छन् । सहकारीले सेवा शुल्क बाहेक अन्य कुनै पनि शुल्क लिन पाउँदैन । सहकारीहरुले सेवा शुल्कका साथै अन्य विभिन्न शुल्कको नाममा ७ प्रतिशतसम्म शुल्क लिने गरेको पाईएको छ ।

यता बागमती प्रदेश सहकारी ऐनले १ प्रतिशतसम्म मात्रै सेवा शुृल्क लिन पाउने व्यवस्था गरेको छ । १ प्रतिशतभन्दा बढी सेवा शुल्क लिने संस्थालाई कारबाही हुने व्यवस्था ऐनले गरेको छ । तर, हालसम्म बढी सेवा शुल्क लिने सहकारीलाई प्रदेश सरकारले कारबाही गर्न सकेको छैन ।