सहकारी पार्टी विवेकशील नेपाली दलमा मिसियो

काठमाडौं : सहकारी पार्टी नेपाल विवेकशील नेपाली दलसँग मिसिएको छ । दुई पार्टीले आइतबार सम्मिलन सम्झौतामा हस्ताक्षर गरेका हुन् ।

विवेकशील नेपाली दलका अध्यक्ष मिलन पाण्डेकाअनुसार एकीकरणसँगै बनेको विवेकशील नेपाली दलले पार्टीलाई सुसंस्कृत राजनीतिको केन्द्र बनाउने उद्घोष गर्नुभयो ।

विवेकशील नेपाली दल २०६९ देखि नेपालमा वैकल्पिक सुसंस्कृत राजनीति गर्दै सक्रिय छ भने सहकारी पार्टी नेपाल सहकारी आन्दोलनलाई संस्थागत गर्ने र उत्पादनमा केन्द्रित गर्ने नीति तय गर्दै राजनीतिमा सहकारी संस्कृति स्थापित गर्ने उद्देश्य लिएर २०७० सालदेखि देखि सक्रिय थियो ।

सम्मिलन सम्झौतापत्र अनुसार एकीकृत दलको नाम “विवेकशील नेपाली दल” नै रहने र विधान र राजनीतिक दस्ताबेज पनि विवेकशील नेपाली दलकै कायम रहने छ ।

सहकारी पार्टी नेपालका अध्यक्ष हिरामणि पौडेलले सहकार्य तथा मेलमिलापको नीति अनुरूप विवेकशील नेपाली दलको नेतृत्वमा वैकल्पिक केन्द्र निर्माण गर्न हामीले यो ऐतिहासिक कदम चालेको बताउनुभयो ।