‘सहकारीका कर्मचारीलाई प्रहरीले दुःख दियो’

काठमाडौं : उपत्यकाका तीन वटै जिल्ला प्रशासन कार्यालयले भदौं ३ गतेदेखि गरेको निषेधाज्ञामा सहकारी संस्था नखुलाउन निर्देशन दिएको छ । तर, सदस्यको माग अनुसारको सेवा सहकारी संस्थाले प्रवाह गरिरहेका छन् । सम्पर्क व्यक्तिमार्फत सेवा प्रवाह गर्न पनि सहकारीलाई कठिनाई भएको छ ।

सदस्यलाई अस्पतालमा पैसा पुर्याउन जाँदा पनि कर्मचारीले प्रहरीको दुव्र्यवहार भोग्नु परेको छ । अस्पतालमा सहकारीका सदस्यलाई पैसा पुर्याउन जाँदा ४ घण्टा सडकमै प्रहरीले रोकिदिएको हाम्रो सगरमाथा बहुउद्देश्यीय सहकारी संस्थाका उप महाप्रवन्धक गोपीनाथ घिमिरेले बताउनुभयो ।

लकडाउन सुरु भएको समयदेखि नै घरदैलो सेवालाई संस्थाले निरन्त जारी राखेको छ । ‘सदस्यले फोन गरेर बचत फिर्ता माग्नु हुन्छ । पैसा पुर्याउन जाँदा प्रहरीले रोकिदिन्छ’, उहाँले भन्नुभयो, ‘यस्ता समस्या हाम्रा कर्मचारीले दिनहुँ भोग्नु परेको छ ।’

नियामक निकाय र सहकारी अभियानबाट यस्ता विषयमा उचित पहल हुन नसम्दा यस्ता समस्या भोग्नु परेको उहाँको भनाई छ ।

‘सदस्यहरु संस्थामा आउन जान समस्या हुने कारणले घरमै पैसा माग्नुहुन्छ’, उहाँले भन्नुभयो, ‘सेवा दिनुपर्ने बाध्या एकातिर हुन्छ र हाम्रो समस्या अर्कोतिर ।’ यस्ता विषयमा सहकारी अभियानबाट तत्काल आवश्यक पहल गरिदिन घिमिरेले आग्रह गर्नुभयो ।

हालको अवस्थामा पनि संस्थाले दैनिक करिब ४० जना सदस्यलाई सेवा प्रवाह गरिरहेको घिमिरेको भनाई छ । यस्तो अवस्थामा पनि आफ्नो सेवालाई निरन्तरता दिन नसकेका सहकारीप्रती आम मानिसमा वितिष्णा हुने उहाँको भनाई छ ।

यस्तै संस्थामा कार्यरत १६० जना कर्मचारीको कोरोना बिमा समेत गराईसकेको छ ।