नेफ्स्कुनले नतिजामुखी ढंगले काम गर्दछः अध्यक्ष पौड्याल

काठमाडौं, ३२ साउन

नेफ्स्कुनका अध्यक्ष परितोष पौड्यालले नेटवर्क म्यानेजमेन्टलाई आधार मानेर ४ वर्षे रणनीति तयार गरेको बताउनुभएको छ ।

नेफ्स्कुनको आज सम्पन्न ३३ औं स्थापना दिवसको अवसरमा बोल्दै उहाँले सदस्यको आर्थिक विकास र गुणस्तरीय जीवन ‘सुखी नेपाली, समृद्ध नेपाल’ प्राप्तिका लागि माइलस्टोन भएको बताउनुभयो । त्यसको प्राप्तिका लागि नेफ्स्कुनले नतिजामुखी ढंगले काम गर्ने समेत उहाँले प्रष्ट पार्नुभयो ।

सहकारी राज्यको सहयोगी र विकासको साझेदारको रुपमा अगाडि बढेको बताउनुहुँदै उहाँने भन्नुभयो, ‘प्रवर्द्धन र नियमन दुवैमा राज्य उत्तरदायी हुनुपर्छ, एउटा कुरामा आँखा चिम्लियो संस्थाहरु दुर्घटनामा पर्न सक्छन् ।’

साकोसहरुलाई गुणस्तरीय बनाउन मुख्य आधार नै जोखिममा आधारित सुपरीवेक्षण कार्यक्रम, प्रोबेसन र एक्सेस ब्राण्ड भएको भन्दै उहाँले आजबाट ‘आधारशीला कार्यक्रम’को शुभारम्भ गरिएको बताउनुभयो । चारवटा आधारलाई टुल्सको रुपमा प्रयोग गरिए सहकारीमा दुर्घटना नहुने उहाँको भनाई छ ।