घरदैलो सेवा स्थगित गर्न सहकारी महासंघको अपिल

ललितपुर । राष्ट्रिय सहकारी महासंघले सहकारी संघ/संस्थालाई घरदैलो सेवा स्थगित गर्न अपिल गरेको छ ।

मुलुकभरि फैलिएको कोरोना भाइरस (कोभिड–१९) महामारीबाट सहकारीका सदस्य, कर्मचारी र संचालकहरुको स्वास्थ्यमा जोखिम उत्पन्न भएकाले महासंघले घरदैलो मार्फत हुँदै आएको बचत संकलन र निक्षेप भुक्तानी सेवा स्थगन गर्न आह्वान गरेको हो ।

महासंघले आज (साउन २९) गते एक विज्ञप्ति प्रकाशित गरेर सहकारीलाई सम्भव भएसम्म प्रविधिको प्रयोगमार्फत सेवा प्रवाह गर्न आग्रह गरेको छ ।

जोखिम न्यूनिकरण गर्न कार्यालय समय घटाएर ५० प्रतिशत कर्मचारी मार्फत सेवा दिन र पूर्णरुपमा संस्था बन्द गर्नुपर्ने परिस्थिति सिर्जना भएमा सम्पर्क व्यक्ति तोकेर सदस्यलाई अत्यावश्यक सेवा दिन अपिल गरेको छ ।

यसैगरी महासंघले सहकारीलाई आगामी असोज मसान्त भित्र सम्पन्न गरिसक्नुपर्ने आर्थिक वर्ष २०७६/०७७ को लेखा परीक्षण कार्य अगाडि बढाउन र जोखिम न्यूनिकरणका लागि आवश्यक नीति तथा कार्यक्रम तर्जुमा गर्न आह्वान गरेको छ ।

सहकारी ऐन, २०७४ अनुसार सहकारी संघ/संस्थाले आर्थिक वर्ष समाप्त भएको ६ महिना भित्र वार्षिक साधारण सभा सम्पन्न गरिसक्नुपर्ने व्यवस्था रहेको भएपनि महासंघले विषम परिस्थितिका कारण वैकल्पिक उपाय खोज्न नियामक निकायसंग छलफल गरिरहेको जनाएको छ ।