विपत्‌मा सारथी बन्यो रामकोट सहकारी, ६ लाख २१ हजार ब्याज र जरिवाना छुट

धादिङ, १५ साउन

निलकण्ठ–८ साँघुटारमा मुख्य कार्यालय रहेको रामकोट बचत तथा ऋण सहकारी संस्थाले लकडाउन अवधिमा सदस्यहरुलाई ६ लाख २१ हजार रुपैयाँ ब्याज र जरिवाना छुट गरेको छ । संस्थाले ५ देखि १५ प्रतिशतसम्म ब्याज छुट र शत प्रतिशत जरिवाना छुट गरेको हो ।

लकडाउनका कारण सदस्यहरुको आम्दानी नभएको अवस्थामा राहत स्वरुप संस्थाले छुट दिएको संस्थाका अध्यक्ष हेमराज श्रेष्ठले जानकारी दिनुभयो । ब्याज र जरिवाना छुट गरेपनि संस्थाका सदस्यहरु खुसी भएको उहाँको भनाई थियो । छुट दिएकै कारण समयमै ब्याज र किस्ता उठाउन समेत सफल भएको उहाँको भनाई छ ।

संस्थाले ब्याज छुट वापत २ लाख ६६ हजार ९ सय २५ रुपैयाँ र जरिवाना वापत ३ लाख ५४ हजार ४ सय ६३ छुट गरेको संस्थाका व्यवस्थापक दुर्गा श्रेष्ठले जानकारी दिनुभयो । संस्थाका सम्पूर्ण ऋणी सदस्यहरुले छुटको उपयोग गरेको उहाँलले बताउनुभयो ।

रामकोट साकोस समुदायमा आधारित धादिङ जिल्लाकै उत्कृष्ठ सहकारी संस्था हो । निलकण्ठ नगरपालिका भर कार्यक्षेत्र रहेको संस्थामा १४ सय ३ सदस्य आवद्ध भएका छन् । हाल संस्थाले निलकण्ठ नगरपालिका वडा नं. ८ र ९ मा मात्र सेवा प्रवाह गरेको छ । संस्थाको सेयर पुँजी ८० लाख ७४, बचत ४ करोड ७९ लाख ४३ हजार र लगानी ४ करोड ८६ लाख ३९ हजार रुपैयाँ रहेको व्यवस्थापक श्रेष्ठले जानकारी दिनुयभो । संस्थाले रामकोट हटियामा सेवा केन्द्र खोली कारोबार समेत गर्दै आएको छ ।

जिल्लाकै उत्कृष्ठ वित्तीय सहकारी बनाउने अभियानका साथ अघि बढेको अध्यक्ष श्रेष्ठले बताउनुभयो ।