चाइना ट्रेडद्वारा संरक्षित पूँजी फिर्ता कोषको रकम बाँडफाँड, एउटै सदस्यले पाए एक लाख २१ हजार

काठमाडौं, ३० असार

चाइना ट्रेड बहुउद्देश्यीय सहकारी संस्थाले आर्थिक वर्ष २०७५/७६ को संरक्षित पूँजी फिर्ता कोषको रकम सदस्यहरुलाई बाँडफाँड गरेको छ ।

कोषमा रहेको रकम नियमित कारोबार गर्ने सदस्यहरुलाई बाँडफाँड गरेको संस्थाले जनाएको छ । सहकारी ऐन २०७४ र नियमावली २०७५ को प्रावधान अनुसार संस्थाले उक्त कोषको रकम सदस्यलाई फिर्ता गरेको हो ।

सदस्यहरुको जम्मा गरेको बचतको लागि ४० प्रतिशत र कर्जामा तिरेको ब्याजको लागि ६० प्रतिशत भार आधारमा रकम फिर्ता गर्नुपर्ने कानुनी प्रावधान रहेको छ ।

संस्थाले कर्जा कारोबार गर्ने १ सय ६४ जना सहित बचत तथा ऋणको कारोबार गर्ने ४ सय ७ जना यसबाट लाभान्वित भएका छन् ।

बचतमा योगदान गर्ने सदस्यले सबैभन्दा बढी ९० हजार ३ सय ४४ रुपैयाँसम्म प्राप्त गर्न सफल भएको संस्थाका प्रमुख कार्यकारी अधिकृत राजेन्द्र कुमार श्रेष्ठले जानकारी दिनुभयो । त्यस्तै कर्जा १ लाख २१ हजार ८ सय ८७ रुपैयाँ सम्म रकम प्राप्त गरेको श्रेष्ठको भनाई छ ।