शिवजी सापकोटाको दोस्रो कृति ‘सहकारीको नतिजामुखी नेतृत्व’ प्रकाशित

काठमाडौं, २७ जेठ

नेफ्स्कूनका प्रमुख कार्यकारी अधिकृत शिवजी सापकोटाको दोस्रो कृति ‘सहकारीको नतिजामुखी नेतृत्व’ प्रकाशित भएको छ ।

यो पुस्तक सहकारी संघ/संस्थाका सञ्चालक समिति र लेखासुपरीवेक्षण समितिका लागि अति उपयोगी हुने अपेक्षा लेखक सापकोटाले गर्नभएको छ । पुस्तक यही जेठ १० गतेदेखि बजारमा आएको हो । सापकोटाको पहिलो कृति ‘सहकारीको नतिजामुखी व्यवस्थापन’ गत वर्ष (२०७६) मा प्रकाशित भएको थियो ।

पुस्तक सहकारी सञ्चालनको परिकल्पना र नीतिगत पक्षलाई लक्षित गरिएको छ । सहकारी क्षेत्रका सञ्चालक समिति र विशेष गरी नेतृत्व वर्गलाई लक्षित गरी सन्दर्भहरु र विधिहरु यस पुस्तकमा समावेश भएका छन् । २२ वर्षे सहकारी यात्रा (कार्यगत अनुभव) लाई समेटी कुशल नेतृत्व निर्माणका लागि र समग्र सहकारी सञ्चानका लागि मार्गदर्शक प्रकाशन रहने अपेक्षा लेखक सापकोटाले गर्नुभएको छ ।

यस पुस्तकलाई आम सहकारीकर्मीहरुले अध्ययन गरी सहकारी क्षेत्रको बुझाई अभिवृद्धि गर्न सकेमा नेपालमा नीति, विधि र प्रविधिको बाटोमा लम्केको सहकारी अभियानले थप नयाँ उचाई कायम गर्ने सहकारी विभागका रजिष्ट्रार डा. टोकराज पाण्डेले प्रतिक्रिया दिनुभएको छ ।

लेखक सापकोटोले पुस्तकमा सञ्चालक समितिको भूमिका, सञ्चालक समितिको जवाफदेहीता, समितिको बैठक, रणनीतिक योजना, सफलताको योजना, सामाजिक प्रभावकारीता व्यवस्थापन, नीति निमार्ण प्रकृया, लेखासुपरीवेक्षण समितिका विषय उठान गरेका गर्नुभएको छ । त्यस्तै नेपालमा सहकारीका चुनौतीहरु, जोखिम न्यूनिकरणका लागि स्थिरीकरण कोषको विश्वव्यापी अवधारण, ऋण लगानी व्यवस्थापन, गुणस्तर सुनिश्चितता र प्रतिक व्यवस्थापन, एकीकरणको महत्व, सदस्य शिक्षा लगायतका विषय उठान गर्नुभएको छ ।

यस पुस्तक लेखकलाई सम्पर्क गरेर, नेफ्स्कूनका केन्द्रिय कार्यालय वा फिल्ड अफिसमा सम्पर्क गरेर खरिद गर्न सकिनेछ । पुस्तकको मुल्य ५ सय रहेको छ । यस्तै पहिलो कृति पनि सोही स्थानबाट खरिद गर्न सकिने जनाईएको छ ।