सहकारीको निक्षेप र कर्जाको ब्याजदरको अन्तर ६% भन्दा बढ्दैन : मन्त्री अर्याल

काठमाडौं, २६ जेठ

भूमि व्यवस्था, सहकारी तथा गरिबी निवारण मन्त्री पद्माकुमारी अर्याललेसहकारीबाट प्रवाह हुने निक्षेप र कर्जा ब्याजदर बीचको अन्तर ६ प्रतिशत भन्दा बढी नहुने व्यवस्था गरिएको बताउनुभएको छ ।

मन्त्रालयको विनियोजन विधेयक माथि भएको छलफलका क्रममा उठेका प्रश्नहरुको जवाफ दिनुहुँदै मन्त्री अर्यालले यस्तो बताउनुभएको हो ।

सहकारी क्षेत्रको सञ्चालन र व्यवस्थापनमा सुशासनको अनुभूति हुने गरी सुधारको शुरुआत गरिएको पनि उहाँले बताउनुभयो । सहकारीलाई उत्पादन र उद्यमशीलतामा जाने गरी नीतिगत प्रोत्साहनका कार्यक्रमहरु शुरु गरिएको र सहकारी ऐन र नियमावलीमा भएको व्यवस्था अनुसार नियामक तहबाट विशेष अनुगमन भइरहेको उहाँको भनाइ थियो ।

विषयगत सहकारी संघ तथा राष्ट्रिय सहकारी महासंघबाट समेत नियमित अनुगमन भइरहेको पनि जानकारी दिनुभयो ।

समान उद्देश्य भएका सहकारीहरुको एकीकरण प्रक्रिया अगाडि बढाउने व्यवस्था भएको र सहकारी क्षेत्रको सम्पूर्ण व्यवस्थापन, सुदृढ सूचना प्रणाली स्थापना र विस्तृत अनुगमनको लागि सहकारी तथा गरिबी अनुगमन प्रणाली कोपोमिस लागू गरी सम्पूर्ण सहकारीहरुको तथ्याङ्क व्यवस्थित गर्ने कार्य भरहेको बताउनुभयो ।