वित्तीय संकट समाधानमा नेफ्स्कून र सहकारी बैंकबीच सहकार्यको सहमति

काठमाडौं, १८ बैशाख

नेपाल बचत तथा ऋण केन्द्रीय सहकारी संघ लि. (नेफ्स्कून) र राष्ट्रिय सहकारी बैंक लि. बीच कोरोना भाइरसले उत्पन्न वित्तीय संकट समाधानमा सहकार्य गर्ने सहमति भएको छ ।

हाल विश्वभर महामारीको रुपमा फैलिएको कोभिड–१९ संक्रमणका कारण नेपालका सहकारीहरुमा तत्काल पर्न जाने वित्तीय संकटको व्यवस्थापन एकीकृत पहलबाट गर्न दुई केन्द्रीय निकाय सहमत भएका हुन् । त्यसका लागि नेफ्स्कूनका बरिष्ठ उपाध्यक्ष चन्द्र प्रसाद ढकालको संयोजकत्वमा ८ सदस्यीय संयुक्त कार्यदल समेत गठन गरिएको छ ।

रणनीतिक ढंगले नेपालको सहकारी अभियानलाई व्यवस्थित र व्यावसायिक बनाउन आवश्यक सहकार्य मार्फत साझेदारीका क्षेत्रहरु तय गरी संयुक्त रुपमा सहकारी प्रबर्द्धन, विकास, व्यावसायिकीकरण र प्राविधिकीकरणका लागि दुबै संस्थाका प्रमुख कार्यकारी अधिकृतहरु पदेन सदस्य रहने कार्यदल गठन गरिएको आज जारी संयुक्त बिज्ञप्तिमा उल्लेख छ । उक्त कार्यदलले नेफ्स्कून र सहकारी बैंकले उपलब्ध गराउने सेवा, नीतिगत वहस पैरवी तथा प्रविधि विकासका लागि आवश्यक मार्गदर्शनका बारेमा विस्तृत गृहकार्य गरी प्रतिवेदन बुझाउने निर्णय छलफलमा भएको विज्ञप्तिमा उल्लेख छ ।

कार्यदलमा नेफ्स्कूनका तर्फबाट महासचिव दामोदर अधिकारी र कोषाध्यक्ष दीपक पनेरु पनि सम्मिलित हुनुहुन्छ भने सहकारी बैंकका तर्फबाट सञ्चालकहरु सरिता भट्टराई, ज्ञान बहादुर तामाङ्ग र रामहरि बजगाई सदस्य रहनुभएको छ । आजको छलफलमा दुबै संस्थाले व्याजदरमा एकरुपता कायम गर्ने र कोभिड १९ संक्रमणको अवस्थामा सहकारी क्षेत्रलाई आवश्यक पर्ने वित्तीय सेवा सहजिकरणका लागि विपद् व्यवस्थापन केन्द्रीय तरलता कोष सुरु गर्ने सहमति जुटेको विज्ञप्तिमा जनाइएको छ ।