सहकारीकर्मी र सदस्यलाईको लागि महासंघले बनायो मनोवैज्ञानिक भिडियो परामर्श

काठमाडौं, १८ बैशाख

राष्ट्रिय सहकारी महासंघले कोरोना भाइरसको महामारीका कारण जनसमुदायमा परेको मनोवैज्ञानिक असरलाई न्युनिकरण गर्ने उद्देश्यले मनोवैज्ञानिक भिडियो परामर्श सार्वजनिक गरेको छ ।

महासंघले २०७६ बैशाख १८ गते सामाजिक संजाल तथा युटुव च्यानलमार्फत मनोवैज्ञानिक भिडियो परामर्श सार्वजनिक गरेको हो । नेतृत्व चेतना कोच इन्द्र गुरुङले सो भिडियोमा परामर्श दिनुभएको छ ।

उहाँले कोरोना भाइरसका कारण मनमा डर त्रास भएमा कसरी तनाव व्यवस्थापन गर्ने, लकडाउनमा घरमा कसरी समय व्यवस्थापन गर्ने, तन र मनलाई कसरी सक्रिय बनाउने लगायतको विषयमा प्रभावकारी परामर्श दिनुभएको छ ।

महासंघका महाप्रबन्धक चित्राकुमारी थाम्सुहाङ सुब्बाले ११ चैतदेखि भएको लकडाउन र कोरोना भाइरसका कारण विश्वमा फैलिएको महामारीका कारणमा मानिसमा मनोवैज्ञानिक असर परेकाले महासंघले जनहितका लागि यो भिडियो तयार गरेको बताउनुभयो ।

कोरोना महामारी र लकडाउनले सहकारीका सञ्चालक, सदस्य र कर्मचारीहरुमा एक खालको डर, चिन्ता देखिएको र सोही डर, चिन्तालाई कम गर्न भिडियो निमार्ण गरेको उहाँले बताउनभयो ।

सहकारीका सदस्य, सहकारीकर्मी तथा सदस्यहरुका लागि यो भिडियो निकै प्रभावकारी हुनेछ उहाँको भनाई छ । भिडियोमार्फत डर र चिन्ता मुक्त गर्न निकै सहयोग पुग्ने उहाँको भनाई छ ।

उपत्यकामा उपलब्ध महासंघका संचालकहरुसँगको छलफलले मनोवैज्ञानिक परामर्श भिडियो निर्माण गर्ने निर्णय गरेको थियो । जसअन्तर्गत यो भिडियो तयार भएको हो । सो भिडियो अपलोड भएको केहि समय मै ३ हजारभन्दा बढीले हेरिसकेका छन् ।