ॐ श्री गोसाइँकुण्ड सहकारीले ब्याज रकममा २० प्रतिशत छुट दिने

नुवाकोट, १५ बैशाख

लकडाउनको समयमा ॐ श्री गोसाईकुण्ड बहुउद्देश्यीय सहकारी संस्था सदस्यलाई राहत स्वरुप विभिन्न छुट दिने भएको छ ।

संस्थाका अध्यक्ष इन्द्रबहादुर पण्डितको अध्यक्षतामा सोमबार बसेको बैठकले स्थानीय तहलाई आर्थिक सहयोग प्रदान गर्ने र सदस्यलाई छुट प्रदान गर्ने निर्णय गरेको हो ।

लकडाउनको अवधिभित्र सदस्यले तिर्नुपर्ने सावा, व्याज नियमित तिरेमा ब्याज रकममा २० प्रतिशत छुट र हर्जना नलिने निर्णय गरेको छ ।
त्यस्तै लकडाउन अवधिमा सावा नतिरि व्याज मात्र तिर्ने सदस्यहरुको लागि ब्याज रकममा १५ प्रतिशत दिने र हर्जना छुट हुने समेत निर्णय संस्थाले गरेको छ ।

त्यस्तै संस्थाले विदुर नगरपालिकालाई संस्थाकोतर्फबाट ५१ हजार ६२ रुपैयाँ, बैठक भत्ता वापत ८ हजार पाँच सय रुपैयाँ, कर्मचारीको तर्फबाट ६ हजार ३ रुपैयाँ सहयोग गर्ने निर्णय संस्थाले गरेको छ ।