सवारी पास, प्रयाप्त तरलता छैन कसरी खोल्नु सहकारी ?

काठमाडौं, १२ बैशाख

बागमती प्रदेश सरकारले वित्तीय कारोबार गर्ने सहकारीलाई दैनिक कार्यालय खोल्न निर्देशन दिएसँगै विभिन्न टिका टिप्पणी सुरु भएको छ । सूचना जारी भएपछि केही सहकारीले आजबाट नियमित सेवा सुरु गरेका छन् । कतिपय सहकारीका सञ्चालक÷कर्मचारीले भने यसको विरोध गरेका छन् ।

केही सहकारी संस्थाले यसअघि देखिनै सेवा प्रवाह गरीरहेका छन् भने केही सहकारी पूर्ण रुपमा बन्द छन् । धेरैजसो सहकारी संस्थाले आफ्ना सदस्यलाई घरमै पुगेर सिमित सेवा प्रवाह गरिरहेका छन् ।

कतिपय सहकारी सातामा २/३ दिन कार्यालयबाट सेवा प्रवाह गरिरहेका छन् । यातायात पास नभएका कारण कार्यालय बन्द गराउनु परेको प्रतिक्रिया दिएका छन्, भने कतिपयले निरन्तर सेवा प्रवाह गरिरहेका छन् ।

लकडान सुरु भएको केही दिनमा सहकारी विभागले सूचना जारी गरी सेवा निरन्तरता दिन अनुरोध गरेको थियो । तर, सहकारी महासंघ कार्यालय खोल्न नसकिने र सम्र्पक व्यक्तिमार्फत सेवा दिन सकिने प्रतिक्रिया दिएको थियो ।

कार्यालय खोलेर सेवा प्रवाह गर्न चाहने सहकारी संस्थाको लागि संघीय सहकारी मन्त्रालयले जिल्ला प्रशासन कार्यायलमार्फत पास समेत मिलाईदिएका छन् । मन्त्रालयले पास आवश्यक भएमा उपलब्ध गराउने समेत जनाएको छ ।

संस्थामा प्रयाप्त तरलता नहुँदा समस्या आउने होकी भनेर समेत कार्यालय खोलेका छैनन् । कार्यालय खोलेका सहकारीले पनि सिमित मात्रामा भुक्तानी गर्ने गरेका छन् । सहकारीका सदस्यहरु आफूलाई आवश्यक परेको रकम निकाल्न नपाउँदा आक्रोश समेत पोख्ने गरेका छन् । नयाँ निक्षेप नआउने र अलि अलि भएको पैसा पनि सकिने हो की भनेर सहकारी संस्थाका सञ्चालक चिन्तित देखिन्छन् ।

खासगरी कार्यालय धेरै समय खोल्दा निक्षेप फिर्ता हुने र संस्थानै समस्यामा पर्ने सम्भावना प्रवल छ । यस विषयमा सरकार, अभियान मौन छ ।