हाम्रो सगरमाथाको सम्पूर्ण सेवा केन्द्र खुला, सदस्यको अवस्था समेत बुझिने

काठमाडौं, १२ बैशाख

बागमती प्रदेश सरकारले निर्देशन जारी गरेको भोलीपल्टै हाम्रो सगरमाथा बहुउद्देश्यीय सहकारीका सबै सेवाकेन्द्र खुला गर्ने निर्णय गरेको छ ।

बागमती प्रदेश सहकारी मन्त्रालयले बिहीबार वित्तीय सहकारी दैनिक ३ घण्टा कार्यालय खोलेर सेवा दिन निर्देशन जारी गरेको थियो । संस्थाले घरदैलो र समय समयमा कार्यालय खोली सेवा प्रवाह गरिरहेका थियो । अब संस्थाका सबै सेवाकेन्द्र आइतबारबाट खुला हुनेछ । मन्त्रालयको निर्देशन र सहकारीका सदस्यलाई पर्न सक्ने वित्तीय आवश्यकतालाई मध्येनजर गर्दै कार्यालय खुला गरिएको उप–महाप्रबन्धक गोपिनाथ घिमिरेले जानकारी दिनुभयो ।

यस अघि पनि संस्थाले निरन्तर सेवा प्रदान गर्दै आएको थियो । लकडाउनको समयमा संस्थाले झण्डै सात हजार सदस्यलाई घरदैलो सेवा प्रवाह गरेको घिमिरेले बताउनुभयो ।

संस्थाले कर्मचारीको व्यवस्थापन गर्न सेवा केन्द्र प्रमुखलाई जिम्मेवारी दिएको छ । सदस्यको अवस्था बुझ्न समेत कर्मचारीलाई संस्थाले निर्देशन दिएको छ ।

सम्पूर्ण सदस्यहरुको अवस्था र समस्याका बारेमा फोन अथवा अन्य विकल्पमार्फत बुझ्न समेत कर्मचारी परिचालन गरिएको घिमिरेले बताउनुभयो । सुरक्षाको विधि अपनाएर सदस्यको सेवामा क्रियाशिल रहेको उहाँको भनाई छ ।

संस्थाको १८ वटा सेवा केन्द्र रहेका छन् ।